Që prej përshkallëzimit të protestave në përplasje të dhunshme me policinë, kryeministri Edi Rama ka ashpërsuar t...
AKTUALITET
Fasada e rikonstruksionit 4.2 milion euro për ca vrima dhe suvatime
PiranjatPërditësimi i fundit 26 Dhjetor 2025, 23:41
Një qytetar nga Gjirokastra ka ngritur shqetësime serioze mbi cilësinë e punimeve të kryera në kuadër të rikonstruksionit të Spitalit Rajonal të qytetit. Sipas tij, punimet janë realizuar në mënyrë sipërfaqësore, ndërsa cilësia e tyre “lë shumë për të dëshiruar”.
Qytetari denoncon se në disa ambiente suvaja ekzistuese nuk është hequr apo përgatitur siç duhet, por është mbuluar mbi të vjetrën, duke ngritur pikëpyetje mbi qëndrueshmërinë dhe standardin e punimeve.
“Suvaja nuk është gërmuar fare, thjesht është mbuluar e vjetra me kollë. Punimet janë skandaloze”, shprehet ai.
Sipas tabelës informuese të projektit, bëhet fjalë për objektin “Rikonstruksioni i Spitalit Rajonal Gjirokastër”, i financuar nga Qeveria e Shqipërisë dhe Ministria e Shëndetësisë dhe Mbrojtjes Sociale. Zhvillues është Spitali Rajonal ‘Omer Nishani’ Gjirokastër, ndërsa projekti është hartuar nga “Atelier 4”, “Archimed” dhe “Kejsi-05” sh.p.k.
Mbikëqyrja e punimeve i është besuar “M.A.G Partners” dhe “Civil Cons” sh.p.k, ndërsa kontraktorë janë “Eral Construction Company” sh.p.k dhe “Bajrami N” sh.p.k. Vlera e kontratës kap shifrën e majme prej 419,477,184.2 lekë me TVSH (rreth 4.2 milionë euro).
Ndonëse punimet nisën më 18.12.2024, pamjet e dërguara nga terreni sot, në fund të vitit 2025, tregojnë një realitet që ngre pikëpyetje të ligjshme:
A janë respektuar vërtet standardet teknike për një objekt kaq të rëndësishëm?
A është kryer përgatitja e duhur e mureve apo thjesht po bëhet një mbulim estetitk i vjetërsisë?
Dhe mbi të gjitha, a e justifikon kjo cilësi punimesh fondin prej 4.2 milionë eurosh nga taksat e qytetarëve?
Nuk është hera e parë që në redaksi mbërrijnë raportime për punime publike me cilësi të dobët, çka e bën edhe më të domosdoshme transparencën dhe reagimin e institucioneve përgjegjëse.
