Kryetari i PD-së, Sali Berisha i bëri thirrje maxhorancës të anulojë një anti-miting të paralajmëruar për ta mbaj...
AKTUALITET
Krushqia që lidh KPP me Postën Shqiptare dhe ‘oligarkun’ e pullave me vlerë, marifetet që çojnë miliona në një dorë të vetme
b.zPërditësimi i fundit 25 Shkurt 2025, 17:12
Foto ilustruese
TIRANE- Në një kohë kur SPAK është duke hetuar “përbindëshat” e mëdhenj të buxhetit të shtetit si inceneratorët apo sterilizimi, qingjat e urtë “pijnë” dy nëna siç thotë edhe populli. Ky është rasti i një kompanie, e cila është unikale dhe vlen për rast studimi. Adel Co është fituese e çdo tenderimi publik me vlerë të lartë në lidhje me produktet e letrës, dosjeve, kutive apo paketimeve të tjera.
Raportimi që Dosja.al po i bën këtij skandali na njeh çdo ditë me një skandal të ri, ku dyshimet përtej privatit ngrihen edhe tek autoritetet shtetërore që duhet të jenë garante e shpërndarjes së parave publike në kompani dinjitoze që konkurrojnë me shërbim dhe jo me zarf dhe përqindje.
Sot do të flasim për emisionin e pullës postare, e tenderuar në vitin 2021, dhe me një dyshim të fortë se janë prodhuar tërësisht jashtë standartit. Por si mund të ndodhte ky skandal në sytë e të gjithëve?
Kjo është një aferë e gatshme për hetim nga ana e SPAK për të parë se çfarë ka bërë Posta Shqiptare dhe Komisioni i Prokurimit Publik. A do të bënte shteti lëshim të tillë në standart duke skualifikuar çdo kompani për të favorizuar Adel co? Pra nuk mjafton që shteti bën përzgjedhje interesash por negocion dhe standartit, duke bërë dy herë shkelje ligji. Nëse nuk është korrupsion, atëherë është mosveprim dhe kjo është një tjetër vepër penale.
Por le ta shpjegojmë më qartë…
Tenderimi i vitit 2021 u zhvillua nga Posta Shqiptare. Procedura emërtohej si “Prodhimi i Emisioneve të Pullës për vitin 2021” me fond limit 11,405,250 lekë pa TVSH”. Në garë morën pjesë 4 kompani, Adel Co, Kristalina KH, Dynamicx Group dhe Albdesign PSP. Tenderi ishte një procedurë e hapur” me objekt “Prodhimi i Emisioneve të Pullës për vitin 2021” me fond limit 11,405,250 lekë pa TVSH.
Pas garës, më 14 shtator, KPP njoftoi se 3 kompanitë Kristalina Kh, Albdesign dhe Dynamics Group u skualifikuan dhe fituese u bë Adel Co. Dy kompanitë u ankuan në KPP. Kristalin Kh kërkoi edhe një ekspertizë të huaj për të krahasuar cilësinë e pullës së prodhuar nga monstrat e saj dhe monstrat e kompanisë fituese. Kjo kompani edhe pse ka aplikuar me të njëjtën letër që ka fituar tenderin Adel Co është skualifikuar 2 herë.
KPP dhe AK me të njëjtën letër skualifikojnë të gjithë pjesëmarrësit për t’ja lënë kontratën Adel Co, pothaujse me një shifër në vlerën limit të shpalljes sic ka ndodhur edhe në tendera të tjerë të fituar nga kjo kompani. Por çfarë ndodh më tej? Kjo kompani e cila fitoi tenderin e prodhoi emisionin e pullës postare me një tjetër letër nga ajo që kishte garuar në dokumentet e tenderit.
Edhe pse ky fakt u denoncua nga konkurrentët, sërish Posta Shqiptare nuk mori asnjë vendim. Lekët ikën tek një dhe e vetmja, Adel Co. Kompania që arrin me “magji” të gllabërojë miliona pa rënë në sy.
Deri në momentin kur një audit i brendshëm i Postës Shqiptare, me datë 13.03.2023 sinjalizoi se në procedurën e prokurimit të sipërcituar subjekti Adel Co shpk ka paraqitur të dhëna të rreme (mospërputhje e skedës teknike me mostrën) për qëllime kualifikimi, dhe ka prodhuar emisione të pullës postare të vitit 2021 me letër të ndryshme nga skeda teknike CPST 114 të dorëzuar me dokumentat e tenderit. Auditi përcaktoi që Adel Co duhet të përjashtohej nga tenderat publikë.
Por çfarë ndodh? Kjo kompani vazhdon të fitojë tendera dhe para publike me një bashkëpunim të habitshëm me KPP dhe me Postën Shqiptare. Të jenë vallë kaq të paaftë?
Do të donim ta besonim, nëse nuk do të njiheshim me një tjetër fakt. Sipas ligjit shqiptar të prokurorimeve, për çdo vonesë në pagesa, Autoriteti Kontraktor është i detyruar të paguajë dëmshpërblim në vlerën 4/1000 të vlerës. Me një formulë të tillë ku Posta Shqiptare “harron” të likujdojë Adel Co, kjo kompani ka përfituar një shumë parash që shkon afro sa gjysma e tenderit.
A mund të jetë kjo një rastësi?
Dosja.al është duke e ndjekur hap pas hapi këtë skandal ku rezulton se çdo para publike e destinuar për prodhim letrash, paketime, kuti apo pulla me vlerë, shkon në një dorë të vetme në një trinom të cilin do ta zbulojmë në ditët në vijim./Dosja.al
