Është rënduar ndjeshëm qarkullimi në aksin Kavajë-Rrogozhinë, në drejtim të Jugut të vendit, ku automjetet j...
AKTUALITET
Merr fund arratia për Taulant Tomën! Sfidoi katër herë burgjet e Europës, ja ku u kap “magjistari” shqiptar i arratisjeve
PiranjatPërditësimi i fundit 26 Gusht 2026, 18:07
“Magjistari” i arratisjeve, siç është cilësuar Taulant Toma për historikun e tij me burgjet evropiane, ka përfunduar sërish në pranga. Policia Kombëtare spanjolle arrestoi në Tarragona të Katalonjës 42-vjeçarin shqiptar, i cili kërkohej nga drejtësia italiane pas arratisjes së tij të katërt.
Policia e arrestoi Tomën të dielën, më 23 gusht, ndërsa autoritetet e bënë publik operacionin më 26 gusht. Gjatë ndërhyrjes, shqiptari bëri rezistencë ndaj efektivëve.
Toma ishte në kërkim që prej 7 dhjetorit 2025, kur u arratis nga burgu Opera në Milano. Ai rezulton i dënuar për grabitje në vila, vjedhje, posedim droge dhe armësh dhe duhet të vuajë pjesën e mbetur të dënimit. Lirimi i tij parashikohej në vitin 2048.
Preu hekurat dhe u arratis nga burgu i sigurisë së lartë
Arratisja e fundit e Tomës ndodhi më 7 dhjetor 2025 nga burgu Opera, në zonën e Milanos, pavarësisht se autoritetet e kishin klasifikuar si të burgosur me rrezik të lartë arratisjeje.
Toma mbahej në një qeli në katin e tretë. Ai kishte siguruar një sharrë, limë, pincë, pjesë metali dhe çelësa anglezë, të cilët i përdori për të prerë hekurat dhe krijuar një hapësirë për të dalë nga qelia.
42-vjeçari, rreth 1.65 metra i gjatë dhe me trup të imët, kishte humbur peshë për të kaluar përmes hapësirës së krijuar mes hekurave. Shoku i tij i qelisë tentoi të ndiqte të njëjtën rrugë, por nuk arriti të kalonte.
Pasi kaloi hekurat, Toma duhej të zbriste nga kati i tretë, në një lartësi prej më shumë se 15 metrash.
Për këtë pjesë të planit kishte grumbulluar gradualisht çarçafë. Ai i lidhi me njëri-tjetrin dhe i përdori si litar për të zbritur drejt oborrit të brendshëm.
Më pas duhej të kalonte murin rrethues, rreth gjashtë metra të lartë. Toma kishte bashkuar disa bishta fshesash me shirit ngjitës dhe në fund kishte vendosur një grep hekuri. Me këtë mjet arriti të kapte pjesën e sipërme të murit dhe të dilte jashtë burgut.
Kamerat e sigurisë e regjistruan duke u larguar në këmbë rreth orës 06:30. Autoritetet konstatuan mungesën e tij vetëm rreth orës 08:00, kur vunë re se shtrati ishte bosh.
Dyshimet se u ndihmua pas arratisjes
Disa orë pas arratisjes, autoritetet gjetën një furgon të braktisur në një zonë pushimi të unazës rrugore. Hetuesit ngritën dyshime se Toma mund të kishte marrë ndihmë nga jashtë dhe të ishte takuar me një bashkëpunëtor pas largimit nga burgu.
Edhe momenti i arratisjes rezultoi i zgjedhur në një ditë feste, kur personeli i institucionit ishte më i reduktuar.
Hetimet përfshinë edhe shokun 25-vjeçar të qelisë. Ai dyshohet se mund të ketë ndihmuar Tomën gjatë përgatitjeve ose të ketë shërbyer si “roje” ndërsa shqiptari realizonte planin.
Arratisja e parë në vitin 2009
Arratisja nga Opera ishte e katërta në historinë e Taulant Tomës.
Në vitin 2009 ai u arratis nga burgu i Ternit, në Umbria të Italisë, gjatë një ndeshjeje futbolli. Autoritetet e lokalizuan dhe e arrestuan disa muaj më vonë në Pavia.
Katër vjet më pas, Toma u arratis përsëri.
Në 2013 u arratis nga burgu i Parmës
Në shkurt 2013, Toma realizoi arratisjen e dytë nga burgu i sigurisë së lartë në Parma.
Edhe në këtë rast ai përdori mjete për prerjen e hekurave. Kishte siguruar një sharrë të vogël dhe tel diamanti, ndërsa për javë të tëra kishte vëzhguar nga qelia lëvizjet e rojeve dhe ndërrimin e turneve.
Pas arratisjes, shqiptari u largua nga Italia. Autoritetet e lokalizuan më vonë në Belgjikë, ku përfundoi përsëri në burg.
Arratisja në Belgjikë me pengmarrje
Toma arriti të arratisej edhe nga burgu në Belgjikë. Një Opel gri u parkua pranë hyrjes së rezervuar për furnitorët. Kur një efektiv iu afrua automjetit, tre persona e sulmuan dhe e morën peng.
Në të njëjtën kohë, brenda burgut disa të dënuar krijuan një situatë shpërqendruese, ndërsa të tjerë formuan një “piramidë njerëzore”. Toma u ngjit mbi ta dhe arriti të kapërcente murin.
Pas kapjes, autoritetet e ekstraduan përsëri drejt Italisë, ku përfundoi në sistemin penitenciar që do ta sfidonte edhe një herë në dhjetor 2025.
