Inteligjenca letoneze po paralajmëron se Rusia po përgatit provokime të mundshme kundër shteteve baltike ose Polonisë, duke...
AKTUALITET
Prodhimi vendas në Shqipëri në vështirësi
PiranjatPërditësimi i fundit 25 Qershor 2026, 13:44
Ekonomia shqiptare po vijon të orientohet gjithnjë e më shumë drejt importeve, ndërsa sektori prodhues dhe eksportues mbetet në vështirësi. Sipas të dhënave të INSTAT për vitin 2025, numri i ndërmarrjeve importuese ka arritur në 15.225, me një rritje prej 3,3% krahasuar me vitin 2024, ndërsa ndërmarrjet eksportuese janë 3.809, me vetëm 0,7% rritje në të njëjtën periudhë.
Struktura e tregtisë vijon të mbetet e pabalancuar, ku importet zënë 71,9% të shkëmbimeve tregtare, ndërsa eksportet vetëm 28,1%. Të dhënat tregojnë gjithashtu se eksportet e mallrave kanë rënë në 346 miliardë lekë, duke shënuar një ulje prej 6,1% krahasuar me një vit më parë, çka tregon një dobësim të mëtejshëm të aftësisë eksportuese të ekonomisë.
Analiza e tregut evidenton përqendrim të lartë te një numër i kufizuar kompanish, ku 50 ndërmarrjet më të mëdha realizojnë 53,4% të eksporteve, ndërsa 100 kompanitë më të mëdha mbulojnë 51,7% të importeve. Partneri kryesor tregtar mbetet Bashkimi Evropian, me Italinë në krye, por edhe këtu vihet re rënie e eksporteve, ndërsa sektorët e mallrave të përpunuara vijojnë të dominojnë, pavarësisht tkurrjes, me rritje të lehtë në bujqësi dhe makineri që nuk mjafton për të balancuar deficitin tregtar.
