Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
AKTUALITET
Projektligji për gjininë/ Xheni Karaj e LGBT: Të përfshihen edhe transgjinorët, të cilët nuk përputhen me seksin e tyre të lindjes
PiranjatPërditësimi i fundit 17 Shtator 2025, 22:21
Xheni Karaj nga Aleanca LGBT+ ka sqaruar pozicionin e saj dhe të organizatës që përfaqëson në lidhje me projektligjin “Për Barazinë Gjinore në Shoqëri”, i cili ka ngjallur debat të gjerë në opinionin publik dhe mediatik.
Karaj thekson se projektligji nuk është propozuar nga Aleanca LGBT+, por organizata ka qenë pjesë e procesit të konsultimit publik, ku kanë marrë pjesë edhe grupe të tjera interesi.
“Është përhapur një keqinformim se ky ligj hap rrugën për 99 gjini apo për t’u regjistruar si kafshë,” shtoi ajo.
Karaj bëri një ndarje mes termave “seks biologjik” dhe “gjini”, duke theksuar se ndërsa seksi biologjik përcaktohet nga organet, kromozomet dhe hormonet, gjinia është një koncept social dhe juridik.
“Seksi biologjik përfshin mashkull, femër dhe persona intersex – foshnje që lindin me karakteristika të dy gjinive. Ndërkohë, gjinia lidhet me mënyrën si individi identifikohet dhe shprehet në shoqëri. Këtu përfshihen edhe personat transgjinorë, të cilët nuk përputhen me seksin e tyre të lindjes,” shpjegoi Karaj.
Ajo theksoi se identiteti gjinor është i njohur si koncept ligjor nga Konventa Evropiane për të Drejtat e Njeriut (KEDNJ), Konventa e Stambollit, Gjykata Evropiane për të Drejtat e Njeriut (GJEDNJ) dhe nga vetë ligji shqiptar kundër diskriminimit. Një tjetër shqetësim që ngriti Karaj ishte fakti se në Shqipëri, personat transgjinorë që kanë kryer ndërhyrje kirurgjikale për ndryshim gjinie nuk mund ta përditësojnë këtë ndryshim në dokumentet e tyre zyrtare, ndryshe nga vendet si Gjermania apo vende të tjera, ku kjo është e mundur dhe e rregulluar me ligj.
“Në dokumentet tona figuron seksi i lindjes, por për ata që kanë kryer tranzicion gjinor, nuk ka mekanizëm ligjor për ta reflektuar këtë ndryshim. Në vende si Gjermania, individët mund të regjistrohen si burra, gra ose me gjininë ‘X’, që përdoret për personat që nuk i përkasin binarit klasik gjinor,” përfundoi Karaj në News24.
