Një ngjarje e rëndë është regjistruar në afërsi të ishujve të Ksamilit, ku është gjetur i pajetë n...
AKTUALITET
“Valë” pezullimesh në radhët e policëve, ja akuzat që rëndojnë mbi ta
PiranjatPërditësimi i fundit 3 Shkurt 2026, 20:45
Pesë efektivë policie janë pezulluar nga detyra brenda një ditë për shkak të akuzave të ndryshme si marrje ryshfeti në rrugë, përdorimin e drogës apo shkeljen e rregullave të qarkullimit rrugor.
Tre prej efektivëve të pezulluar janë nga Komisariatet e Lezhës, Matit e Krujës, mes tyre edhe Besart Kovaçi, i përfshirë në atentatin në berberhane të dielën në Lezhë.
Njoftimi:
Në lidhje me një video të postuar në rrjetet sociale, ku duken dy punonjës të Qarkullimit Rrugor, njëri prej të cilëve dyshohet se ka marrë ryshfet nga drejtuesi i automjetit për të shmangur masën administrative, ju informojmë se:
Drejtoria e Standardeve Profesionale në Drejtorinë e Përgjithshme të Policisë së Shtetit ka pezulluar menjëherë nga detyra inspektor Sh. Ç. dhe inspektor I. L., me detyrë trupë shërbimi trafiku urban/interurban në Seksionin e Trafikut Urban/Interurban, në Sektorin e Policisë Rrugore, në DVP Fier, për shkelje disiplinore të parashikuar nga neni 121, pika 1, germa “m”, e Ligjit nr. 82/2024 “Për Policinë e Shtetit”, “Kryerja e veprimeve që cenojnë rëndë imazhin e punonjësit të policisë, institucionin apo shërbimin policor në tërësi”.
Pezullimi disiplinor u bë pasi, duke qenë në shërbim, kanë kryer veprime në shkelje të procedurave standarde të punës gjatë kontrollit të një drejtuesi mjeti, si dhe dyshohet për kryerje të veprimeve korruptive. Ndaj këtyre punonjësve ka filluar hetimi disiplinor për shkelje të rëndë.
Gjithashtu, nga Drejtoria e Standardeve Profesionale janë pezulluar nga detyra edhe tre punonjës policie, konkretisht:
– Inspektor B. K., i cili më datë 02.02.2026 është ndaluar me urdhër të Prokurorit, i dyshuar për kryerjen e veprës penale “Shpërdorimi i detyrës”, në lidhje me ngjarjen e ndodhur në Rrilë të Lezhës më datë 01.02.2026.
– Inspektor E. P., me detyrë Oficer i Patrullës së Përgjithshme në Komisariatin e Policisë Mat, pasi dyshohet për përdorim të lëndëve narkotike.
– Inspektor E. B., me detyrë Oficer i Patrullës së Përgjithshme në Komisariatin e Policisë Krujë, pasi më datë 02.02.2026 është arrestuar nga AMP, si i dyshuar për kryerjen e veprës penale “Shkelje e rregullave të qarkullimit rrugor”.
Për këto raste është bashkëpunuar me Agjencinë e Mbikëqyrjes Policore e cila ka kryer dhe po kryen veprime hetimore e procedurale në bashkëpunim me Prokuroritë respektive.
Policia e Shtetit është e vendosur të ndëshkojë cilindo punonjës policie që cenon imazhin e Policisë apo shpërdoron detyrën.
Në këtë kuadër, Policia e Shtetit falënderon dhe fton qytetarët dhe mediat që të denoncojnë rastet kur përballen me veprime të paligjshme të punonjësve të policisë apo sjellje joetike që cenojnë imazhin dhe besimin e qytetarëve. /PiranjatNews/
