Me thirrjet 'polici këtu na ke, ti mbron krimin dhe jo ne' protestuesit po protestojnë para Drejtorisë së Policisë së Ti...
AKTUALITET
Vijon protesta para Kryeministrisë, qytetarët i përgjigjen Ramës: Shqipëria ka plot njerëz që mund ta çojnë në BE
PiranjatPërditësimi i fundit 19 Qershor 2026, 20:15
Protesta kundër qeverisë ka vijuar edhe këtë mbrëmje para Kryeministrisë, ku pjesëmarrës të ndryshëm kanë mbajtur fjalime dhe kanë përsëritur thirrjet për largimin e kryeministrit Edi Rama.
Gjatë tubimit, një banore nga Rrjolli iu përgjigj deklaratave të kryeministrit, i cili më herët është shprehur se largimi i tij do të ngrinte pikëpyetje për drejtimin e vendit dhe procesin e integrimit europian.
“Kryeministri tha: nëse do iki unë, kush do ju çojë juve në BE? Unë e shoh se kemi shumë individë që mund të na çojnë drejt BE. Madje ne kemi shkuar më herët në BE. Disa na janë bashkuar, disa janë rrugës”, deklaroi ajo para protestuesve.
Ndërkohë, një tjetër qytetar mbajti një fjalim me tone të forta, duke iu drejtuar veçanërisht të rinjve dhe duke kërkuar vijimin e mobilizimit kundër qeverisë.
Ai u bëri thirrje të rinjve dhe vajzave që të mos heqin dorë nga kauza e tyre dhe të vijojnë pjesëmarrjen në protesta.
“Nuk e mposht dot rininë o torollak, sepse e kanë prejardhjen nga Isa Boletini, Ismail Qemali, Vojo Kushi. Thirrje rinisë dhe vajzave si Shote Galica të mos e lënë kauzën, por t’i japin ultimatumin kryeministrit. Mos u dorëzoni!”, u shpreh ai.
Protesta, e cila ka hyrë në ditën e saj të 20-të, vijon të mbahet para Kryeministrisë, ndërsa pjesëmarrësit kërkojnë dorëheqjen e kryeministrit Edi Rama dhe ndryshime në qeverisjen e vendit.
