Një vatër zjarri ka përfshirë rreth një hektar sipërfaqe në fshatin Derstil, në Qendrën Administrative Gjinar, n&...
AKTUALITET
Vrasja e turistit portugez në Ksamil/ Kjo është 31-vjeçarja turke e arrestuar me Sokrat Vatën
PiranjatPërditësimi i fundit 21 Gusht 2026, 23:14
Mediat turke kanë publikuar detaje nga dëshmia e Ezgi Parlak, 31 vjeçe, e cila është ndaluar nga autoritetet shqiptare në kuadër të hetimeve për vrasjen e turistit portugez Luis Miguel Varela Mendes në Ksamil.
Parlak mohon çdo përfshirje në ngjarje dhe pretendon se nuk kishte dijeni se në bagazhin e automjetit me të cilin udhëtonte ishte fshehur Sokrat Vata, i dyshuari kryesor për vrasjen.
Parlak, e cila thuhet se punon si inspektore/audituese në një kompani ndërkombëtare në Adana të Turqisë, kishte udhëtuar drejt Shqipërisë pesë ditë para ngjarjes. Ajo deklaroi se kishte rënë dakord me shtetasin turk Nuh Mahmutoğlu, 38 vjeç, për të udhëtuar drejt Tiranës
Parlak pretendon se nuk kishte dijeni për personin që ndodhej në pjesën e pasme të automjetit. Gjatë kontrollit nga policia shqiptare, Sokrat Vata u gjet i fshehur në bagazh, pas valixheve, dhe u arrestua.
Në automjet ndodhej edhe Nuh Mahmutoğlu, i cili sipas autoriteteve shqiptare punonte si shofer taksie pa licencë. Të dy shtetasit turq u ndaluan për t’u marrë në pyetje lidhur me rrethanat e transportimit të Vatës dhe për të verifikuar nëse kishin pasur dijeni për praninë e tij në automjet.
Parlak, e cila aktualisht ndodhet në paraburgim, ka këmbëngulur se nuk ka pasur asnjë lidhje me vrasjen. Ajo ka deklaruar se kishte ardhur në Shqipëri vetëm për pushime dhe se planifikonte të qëndronte për pesë ditë.
Edhe familja e 31-vjeçares ka reaguar pas ndalimit të saj, duke mbështetur versionin se Ezgi kishte udhëtuar drejt Shqipërisë për turizëm. Familjarët kanë deklaruar se ajo nuk kishte dijeni për personin e fshehur në bagazh dhe kanë shprehur bindjen për pafajësinë e saj.
Ndërkohë, hetimet e autoriteteve shqiptare vijojnë për zbardhjen e plotë të rrethanave të vrasjes së turistit portugez dhe për të përcaktuar përgjegjësinë e secilit prej personave të ndaluar apo arrestuar.
Sipas vendimit të gjykatës, Ezgi Parlak dhe Nuh Mahmutoğlu janë lënë në masën e sigurisë “arrest në burg”.
