Janë zbuluar emra të tjerë që policia dhe prokuroria e Tiranës, i ka vënë në hetim, lidhur me mashtrimin e bursave onl...
AKTUALITET
Vrau dy basketbollistët e Skënderbeut, Damiano Toshi i shpëton burgut përjetë
PiranjatPërditësimi i fundit 8 Korrik 2026, 18:14
Vrasja e dy basketbollistëve të ekipit të “Skënderbeut” në Korçë ka sjellë heqjen e dënimit me burgim të përjetshëm për Damiano Toshin, duke e dënuar atë përfundimisht me 25 vite burgim.
Damiano Toshi është një nga emrat e njohur të bandës së “Çobenjve”. Ai i ka shpëtuar burgimit të përjetshëm dhe pritet të lërë qelinë pas vendimit të fundit të Gjykatës së Elbasanit.
Gjykata e shkallës së parë shpalli dënimin përfundimtar ndaj Toshit, duke e dënuar me 25 vite burg për vrasjen e dy basketbollistëve dhe plagosjen e Julian Beckës.
Siç mësohet nga gjykata, ulja e dënimit erdhi pasi u pranua kërkesa për gjykim të shkurtuar, çka i hoqi dënimin me burgim të përjetshëm të dhënë më herët.
Toshi u shpall fajtor për vrasjen e dy basketbollistëve të ekipit të “Skënderbeut”, Sokol Jahollari dhe Rafael Rizani, si edhe për plagosjen e Julian Beckës.
Krimi ndodhi më 3 shtator 2004, pranë Pallatit të Sportit në Korçë, dhe konsiderohet një nga ngjarjet më të rënda kriminale të asaj periudhe.
Vendimi i Gjykatës së Elbasanit erdhi pas rigjykimit të çështjes, të urdhëruar nga Gjykata e Lartë.
Kjo e fundit kishte prishur vendimin që e dënonte Toshin me burgim të përjetshëm dhe kishte kthyer dosjen për shqyrtim nga e para.
Megjithatë, çështja pritet të mos mbyllet këtu.
Prokuroria ka paralajmëruar se do ta ankimojë vendimin, duke argumentuar se për akuzën e vrasjes nuk duhet të pranohej gjykimi i shkurtuar dhe, për rrjedhojë, nuk duhej të ulej dënimi.
Ndërkohë, autoritetet po kryejnë përllogaritjen e kohës që Damiano Toshi ka vuajtur në burg.
Nëse rezulton se ai e ka shlyer dënimin e ri prej 25 vitesh, pritet të lirohet nga burgu, duke i dhënë një kthesë të papritur një dosjeje që për më shumë se dy dekada ishte identifikuar me dënimin maksimal të drejtësisë shqiptare.
