Kongresmenja demokrate amerikane Alexandria Ocasio-Cortez ka reaguar lidhur me protestat në Shqipëri, duke i bërë thirrje qeverisë sh...
BOTA
Djali i Donald Trump gjuan specie të rralla në një zonë të mbrojtur në Venecia, çështja shkon në parlamentin e Italisë! Mediat italiane publikojnë pamjet
r.llPërditësimi i fundit 3 Shkurt 2025, 21:45
donald trump
ITALI- Një video që tregon djalin e presidentit amerikan Donald Trump duke gjuajtur rosa në një zonë të mbrojtur në Venecia ka bërë bujë. Çështja ka shkuar edhe në Këshillin Rajonal të Venetos me një interpelancë nga Europa Verde dhe në Parlamentin e Italisë me një kërkesë nga Avs (Të Gjelbrit dhe Aleanca e Majtë) për ndërhyrjen e ministrit Gilberto Pichetto Fratin.
Videoja është xhiruar dhjetorin e kaluar kur djali i presidentit amerikan ishte me pushime në Venecia dhe shoqërohej edhe nga partnerja e tij e re. Me një grup miqsh ai mori pjesë edhe në një udhëtim gjuetie në lagunë, shkruan La Repubblicca, e cila ka publikuar dhe videon. Pamjet u zbuluan fillimisht para pak ditësh në një faqe interneti amerikane, “The global hunt for aventure”, e cila përfshin një intervistë me Trump Junior i rrethuar nga thëllëza dhe rosat.
"Skenat e ndryshme të gjuetisë në lagunën e Venecias, të xhiruara me shumë gjasë kohët e fundit në Valle Pirimpie’ në Campagna Lupia, ndodhen në një zonë të mbrojtur sipas rregulloreve evropiane dhe janë pjesë e rrjetit Natura 2000 të BE-së, si Zonë e Veçantë e Konservimit e quajtur laguna e mesme e poshtme e Venecias.”, ka thënë këshilltari rajonal Andrea Zanoni i Europa Verde
Në video po ashtu shfaqen disa persona, mes të cilëve, siç theksohet nga një mbishkrim specifik, ku shfaqet edhe Donald Trump Junior.
“Në një fragment të videos, Trump shfaqet teksa përshkruan rosat e qëlluara, mes të cilave në plan të parë shihet një Ruddy Shelduck, një rosë shumë e rrallë në të gjithë Evropën me një ngjyrë pothuajse tërësisht portokalli si e ndryshkur”, thotë Zanoni, i cili kujton se gjuetia është e ndaluar për jorezidentët në Itali.
Çështja do të arrijë edhe në Kuvend. Kështu ka lajmëruar deputetja e partisë "Të Gjelbrit dhe Aleanca e Majtë", Luana Zanella ku ka thënë: “Ne po i kërkojmë Ministrit të Mjedisit Pichetto Fratin që të shpjegojë se çfarë ndodhi, duke qenë se vrasja e specieve të mbrojtura është një krim dhe gjithashtu nëse është e vërtetë që Donald Trump Junior, djali i presidentit të Shteteve të Bashkuara ishte në mesin e atyre pjesëmarrësve."
