Revolta kundër ndërtimeve në Zvërnec nuk është kufizuar vetëm brenda Shqipërisë. Dje dhe sot, shqiptarë që...
BOTA
"Na u desh të pinim ujë nga tualeti", aktivistët ndërkombëtar akuzojnë Izraelin për keqtrajtim në burgje
PiranjatPërditësimi i fundit 5 Tetor 2025, 15:09
Disa aktivistë ndërkombëtarë të deportuar nga Izraeli pasi iu bashkuan një flotilje ndihmash për Gazën kanë akuzuar forcat izraelite për keqtrajtim të aktivistes klimatike Greta Thunberg.
Bëhet e ditur se 137 të dëbuarit zbarkuan në Stamboll të shtunën, përfshirë 36 shtetas turq së bashku me aktivistë nga Shtetet e Bashkuara, Italia, Malajzia, Kuvajti, Zvicra, Tunizia, Libia, Jordania dhe vende të tjera, konfirmuan zyrtarët turq.
Gazetari turk dhe pjesëmarrësi në Flotiljen Gaza Sumud, Ersin Celik, tha se ai pa forcat izraelite të torturonin Thunberg, duke përshkruar se si ajo u “zvarrit përtokë” dhe “u detyrua të puthte flamurin izraelit”.
Aktivistja nga Malajzia, Hazwani Helmi dhe pjesëmarrësja amerikane Windfield Beaver dhanë dëshmi të ngjashme në Aeroportin e Stambollit.
“Ishte një katastrofë. Na trajtuan si kafshë”, tha Helmi, duke shtuar se të paraburgosurve u mohohej ushqimi, uji i pastër dhe ilaçet.
Gazetari italian Lorenzo Agostino, i cili kishte qenë në flotilje, përmendi gjithashtu trajtimin e Thunberg.
“Greta Thunberg, një grua e guximshme, është vetëm 22 vjeç. Ajo u poshtërua dhe u mbështoll me një flamur izraelit”, tha ai.
Edhe të tjerë përshkruan keqtrajtim të rëndë.
Prezantuesja televizive turke Ikbal Gurpinar tha: “Na trajtuan si qen. Na lanë të uritur për tre ditë. Nuk na dhanë ujë; na u desh të pinim nga tualeti.” Aktivistja turke Aycin Kantoglu tregoi për muret e burgut të njollosura me gjak dhe mesazhet e shkruara nga të burgosurit e mëparshëm.
“Ne pamë nëna që shkruanin emrat e fëmijëve të tyre në mure. Në fakt, ne përjetuam pak nga ajo që kalojnë palestinezët”, tha ajo. Ndryshe, Ministria e jashtme izraelite thotë se akuzat ndaj keqtrajtimit të Greta Thunberg dhe aktivistëve të tjerë të ndaluar në Flotiljen Global Sumud janë "gënjeshtra të paturpshme".
