Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
BOTA
Nga marrëveshja për mineralet tek armëpushim 30-ditor, Zelenskyy zbulon se çfarë diskutoi me Trump në Vatikan
PiranjatPërditësimi i fundit 3 Maj 2025, 17:33
UKRAINË- Presidenti ukrainas Volodymyr Zelenskyy tha se biseda e tij me Presidentin e SHBA-së Donald Trump në Vatikan ishte më e mira deri më tani, me të dy udhëheqësit që diskutuan sanksionet e SHBA-së dhe mbrojtjen ajrore të Kievit. Zelenskyy tha se biseda në Vatikan që u zhvillua në prag të funeralit të Papa Françeskut shënoi një pikë kthese në marrëdhëniet e tyre.
“Ishte ndoshta biseda më e shkurtër, por më kuptimplote që patëm. Fola për sasinë [e armëve] dhe ai më tha se do të punonin për këtë por këto gjëra nuk janë falas," tha Zelenskyy.
Marrëveshja për mineralet
Takimi duket se ka qenë një katalizator për përfundimin e një marrëveshjeje të rëndësishme midis Uashingtonit dhe Kievit mbi shfrytëzimin e përbashkët të mineraleve strategjike. Siç njoftoi Ministrja e Ekonomisë e Ukrainës, Yulia Svirydenko, korniza e marrëveshjes parashikon krijimin e një fondi të përbashkët investimesh, të cilit SHBA-të mund t'i ofrojnë edhe ndihmë ushtarake. Zelenskyy argumentoi se suksesi i marrëveshjes i hodhi poshtë akuzat ruse për mungesën e gatishmërisë së Ukrainës për të bashkëpunuar me Shtetet e Bashkuara.
"Jam i sigurt se pas takimit tonë në Vatikan, Presidenti Trump filloi t'i shihte gjërat ndryshe", tha ai.
Armëpushim 30-ditor me kushte
Të dy udhëheqësit thuhet se ranë dakord se një armëpushim 30-ditor është "hapi i parë i duhur" drejt paqes. Ky qëndrim ndryshon nga propozimi i njëanshëm i Vladimir Putinit për një armëpushim nga 8 deri më 11 maj, një propozim që u refuzua nga Kievi si i pamjaftueshëm.
"Ne nuk do të luajmë lojën e krijimit të një atmosfere të këndshme në mënyrë që Putini të dalë nga izolimi më 9 maj", tha Zelenskyy.
Rusia po kërkon të shfrytëzojë fuqinë simbolike të Ditës së Fitores për të rivendosur imazhin e saj në skenën ndërkombëtare, me udhëheqës të tillë si Xi Jinping dhe Alexander Lukashenko që priten në Moskë.
Paralajmërime dhe kërcënime
Me një ton veçanërisht të ashpër, Zelenskyy paralajmëroi se Kievi nuk mund të mbahet përgjegjës për atë që ndodh në territorin e Federatës Ruse gjatë festimeve. Ministria e Jashtme ruse i përshkroi këto deklarata si “kërcënuese”.
Nga ana e tij, zëdhënësi i Kremlinit, Dmitry Peskov, këmbënguli se propozimi për një armëpushim tre-ditor është një provë sinqeriteti për qeverinë ukrainase, duke i bërë thirrje Kievit të bëjë deklarata të qarta dhe të paekuivok në favor të paqes.
Afrimi Trump-Zelenskyy krijon një moment të ri në strategjinë negociuese të Ukrainës, ndërsa marrëveshja strategjike mbi mineralet mund të jetë vendimtare si në fushën e betejës ashtu edhe në ekuilibrat gjeoekonomikë. Ndërsa Putini kërkon afirmim ceremonial të pushtetit, Kievi duket se po ndërton në mënyrë metodike një arkitekturë të re aleancash.
