Në fjalën e saj në Kuvend Ina Zhupa ka mbajtur një qëndrim të ashpër ndaj qeverisë Rama.
Zhupa theksoi se ësht&e...
BOTA
Shtëpia e Bardhë anulon ngrirjen e granteve federale për shkollat, strehimin e shëndetësinë, mbetet në fuqi vendimi për ndalimin e fondeve për shtetet e huaja
M.B.Përditësimi i fundit 29 Janar 2025, 21:50
SHBA- Zyra e buxhetit të Shtëpisë së Bardhë ka anuluar një urdhër për ngrirjen e granteve federale, pasi masa e administratës për të ndaluar shpenzimet u duk se rrezikon programet që financojnë shkollat, ofrojnë strehim dhe sigurojnë që amerikanët me të ardhura të ulëta të kenë akses në kujdesin shëndetësor.
Në një memo të së mërkurës dhe shpërndarë agjencive federale, Matthew J. Vaeth, ushtrues detyre i drejtorit të Zyrës së Menaxhimit dhe Buxhetit të Shtëpisë së Bardhë, deklaron se memorandumi i OMB M-25-13 "është anuluar". Ai urdhër, i lëshuar të hënën, udhëzoi agjencitë federale që "të ndalojnë përkohësisht të gjitha aktivitetet në lidhje me detyrimet ose disbursimin e të gjithë ndihmës financiare federale".
Urdhri origjinal i Shtëpisë së Bardhë për ngrirjen e granteve federale, i cili u bë publik të hënën, shkaktoi kaos masiv dhe konfuzion. Sipas mediave të huaja, shtetet raportuan probleme me aksesin në fonde. Zëdhënësja e Shtëpisë së Bardhë Karoline Leavitt tha të martën se ndihma për individët nuk do të preket.
Ndërkohë, Leavitt tha sot me anë të një postimi në platformën 'X' se ndërsa memorandumi i mëparshëm ishte anuluar, urdhrat ekzekutivë të presidentit për ngrirjen e ndihmës së huaj dhe për t'i dhënë fund iniciativave të barazisë dhe përfshirjes së diversitetit, për shembull, mbeten në fuqi.
Nga ngrirja e ndihmës për shtetet e huaja u prek sot edhe Shqipëria pasi Ambasada Amerikane në Tiranë u ka nisur një notë diplomatike institucioneve më të larta shqiptare, ku njoftohet ndërprerja me efekt të menjëhershëm e mbështetjes dhe fondeve, deri në një rishikim të dytë. Ky njoftim vjen pas Urdhrit Ekzekutiv të firmosur nga presidenti amerikan Donald Trump lidhur me ndihmën në vendet e huaja. Ndër institucionet të cilat humbasin më shumë nga këto fonde të ndërprera janë ato të drejtësisë.
Ambasada Amerikane në Tiranë ka reaguar lidhur me njoftimin e shpërndarë nga mediat për ndalimin e fondeve nga SHBA për institucionet shqiptare teksa thotë se vendimi është marrë në përputhje me Urdhrin Ekzekutiv të Presidentit Donald Trump për rivlerësimin dhe riorganizimin e ndihmës ndërkombëtare të Shteteve të Bashkuara. Ambasada i referohet deklaratës për shtyp të Zëdhënëses së Departamentit të Shtetit, Tammy Bruce, të datës 26 janar e cila thotë ndër të tjera se mandati i popullit amerikan ishte i qartë dhe se duhet të ripërqendrohen në interesat kombëtare amerikane.
