Tre ditë më parë tërhoqi partinë e tij nga koalicioni qeveritar, Arben Taravari jep dorëheqjen si Ministër i Shëndetësisë në Maqedoninë e Veriut

SHKUP- Politikan i njohur shqiptar dhe kreu i ‘Aleancës për Shqiptarët’, Arben Taravari ditën e sotme ka dhënë sot dorëheqjen nga posti i Ministrit të Shëndetësisë në Maqedoninë e Veriut. Dorëheqja e tij ka ardhur tre ditë pasi bëri publik vendimin për të tërhequr partinë e tij nga koalicioni qeveritar i udhëhequr nga kryeministri Hristijan Mickoski.

Dorëheqja e Taravarit pritet të ratifikohet javën e ardhshme nga Parlamenti. Gjithashtu pritet edhe emërimi i një ministri të ri, pas një propozimi nga kryeministri, Hristijan Mickosk. Ky zhvillim vjen pas përplasjeve të hapura politike brenda koalicionit dhe tërheqjes së ‘Aleancës për Shqiptarët’ muajin e kaluar edhe nga blloku opozitar shqiptar VLEN (E Meriton), në të cilin kjo parti kishte rolin kryesor.

Taravari tha se qeveria e Mickoskit ka dështuar në forcimin e perspektivës evropiane të vendit dhe ka kontribuar në përkeqësimin e të drejtave të shqiptarëve, të fituara ndër vite me përpjekje dhe sakrifica. Ai më tej akuzoi qeverinë për margjinalizim të shqiptarëve dhe mungesë vullneti politik për përfshirjen e tyre në proceset vendimmarrëse.

‘Aleanca për Shqiptarët’ ka pesë deputetë në një Kuvend me gjithsej 120 anëtarë. Ende nuk është e qartë nëse të gjithë deputetët e kësaj partie do të ndjekin shembullin e Taravarit duke kaluar në opozitë.

Largimi i Taravarit vjen në një kohë të ndjeshme politike për Maqedoninë e Veriut, ku bashkëjetesa ndëretnike dhe përfaqësimi i barabartë i komunitetit shqiptar, që përbën rreth 25% të popullsisë, janë gjithmonë faktorë kyç për stabilitetin politik.