Kongresmenja demokrate amerikane Alexandria Ocasio-Cortez ka reaguar lidhur me protestat në Shqipëri, duke i bërë thirrje qeverisë sh...
BOTA
Tre persona të maskuar morën bizhuteritë nga koleksioni i Napoleon Bonapartit, si ndodhi grabitja në muzeun e Luvrit në Paris
PiranjatPërditësimi i fundit 19 Tetor 2025, 12:38
Një grabitje ka ndodhur këtë mëngjes në Muzeun e Luvrit në Paris, Lajmi u konfirmua nga Ministrja e Kulturës, Rachida Dati, e cila është aktualisht në vendngjarje për të mbikëqyrur situatën.
“Një grabitje ka ndodhur sot në mëngjes, në hapjen e muzeut të Luvrit. Fatmirësisht, nuk ka pasur të lënduar. Jam në vendngjarje me stafin e muzeut dhe policinë. Hetimet janë në vijim,” shkroi Ministrja Dati në një njoftim të shpërndarë në rrjetet sociale.
Sipas të përditshmes Le Parisien, tre autorë të maskuar kanë hyrë në muze nga ana e lumit Sena, përmes një zone ku po kryhen punime ndërtimi. Ata kanë përdorur një ashensor teknik për të arritur direkt në galerinë që kishin shënjestruar, ku ekspozoheshin bizhuteri të çmuara dhe objekte të trashëgimisë perandorake franceze.
Grabitësit kanë thyer xhamin e sigurisë dhe kanë vjedhur nëntë objekte nga koleksioni i Napoleonit dhe Perandoreshës, përfshirë një gjerdan, një karficë dhe një kurorë. Ndërkohë, një nga autorët ka qëndruar jashtë për të siguruar largimin e grabitësve.
Një nga objektet më të çmuara, diamanti “Régent”, i vlerësuar me mbi 140 karatë, nuk është prekur nga grabitësit.
Policia franceze është në vendngjarje dhe ka nisur hetimet për të identifikuar dhe kapur autorët. Vlera e dëmit nuk është bërë ende e ditur. Pas ngjarjes, muzeu është mbyllur për vizitorët, ndërkohë që hetimet po vazhdojnë.
Muzeu i Luvrit, që është institucioni më i vizituar muzeal në botë, regjistroi rreth 9 milionë vizitorë në vitin 2024, prej të cilëve 80% ishin turistë të huaj. Grabitja ka shkaktuar një tronditje të madhe, duke e bërë këtë ngjarje një nga më të mëdha të këtij lloji në historinë e muzeut.
