Në prag të miqësores Shqipëri – Izrael, e cila do të mbahet sonte në stadiumin “Air Albania” të Tiran&...
EDITORIAL
Spidermani i përmbytjeve: Pirro Vëngu mes pusetave dhe propagandës
PiranjatPërditësimi i fundit 7 Janar 2026, 20:06
Spektakël pa krip, tetë makina shoqëruese, ujë i pisët tej gjurit, sirena shurdhuese për hapjen e rrugës për “personalitetin e madh” dhe zbritje pompoze e një imcaku nga fuoristrada me shkronja targe “MM”vetëm dritat e skenave mungonin. Ky është Ministri i Mbrojtjes Pirro Vëngu, i cili prej dy ditësh është bërë si “i shtëpisë” në qytetin e Durrësit. E gjen kudo. Aty ku ka ndonjë pusetë, në një copë kanali që përpilten fadromat e lodhura të bashkisë, apo pranë autoboteve të ushtrisë që më shumë se ujin “pastrojnë fekalet” politike. Durrësi nuk kishte arsye të përmbytej, por arsyet për praninë e një “spidermani ministër” janë të shumta.
Përtej momentit qesharak sesi Vëngu sillet nëpër Durrës, padyshim që duhet të ishte i pranishëm aty ku është situata më e vështirë, por duke drejtuar shtabin e emergjencës dhe marrë masat për çdo nevojë të menjëhershme nga përbytjet që nuk erdhën nga Zoti, por zotërinjtë dhe zonjat e pushtetit lokal dhe qëndror që e kthyen qytetin në moçal të frikshëm.
Pamja e Vëngut po kthehet në barsaletë në Durrës, që edhe me këmbët nën ujë kanë nisur të ironizojnë se “ata vetëm Vëngu mund t’i shpëtojë”. Nuk ndalon të flasë me banorët e përmbytur nga pisllëku qeverisës, por qëndron afër punonjësve të bashkisë apo ushtrisë që më shumë se punojnë bëjnë sikur po punojnë dhe jo për faj të tyre por në atë situatë dhe me mjetet që kanë nuk mund të bëjnë më shumë sesa “ndezja e fadromës së propagandës”.
Në qytetin ku deti është bashkuar me ujin e përmbytjeve mund të ankohesh për gjithçka. Përmbytjet erdhën nga makutëria e korrupsionit me hidrovor jashtë funksionit, apo kanale kulluese tërësisht të bllokuara. Mund të ankohen për kryebashkiaken që minimalisht nuk duhet të presë që të thahet vendi për të shkruar dy gisht letër në të thatë me vetëm dy fjalë: “jap dorëheqjen”.
Por, në Durrës askush nuk mund ta ankohet se nuk është dukur Ministri i Mbrojtjes. Ai njeh çdo pëllëmbë të zonës pasi erdhi direkt nga karriera si Drejtor i Portit në krye të ministrisë. Arsyet dihen. Porti u kthye në han pa porta për kalimin e narkotikëve.
Kushdo që e sheh në këmbë do e ngatërrojë me ndonjë punonjës të komunales dhe e kupton se është goxha ministër kur nis xhirot e vazhdueshme nëpër qytet deri pranë Porto-Romanos.
“Në Durrës ka rënë një sasi prej 110 mm shi, sasi mjaft e madhe. Shkarkimet nga hidrocentralet po bëhen në mënyrë të kontrolluar”, tha Vëngu mbrëmjen e së martës. Përgjatë ditës së sotme është parë tre herë brenda ditës të qarkullojë me eskortën e madhe të tij pranë Burgut të Durrësit. Një vëmendje e madhe ishte atje, ndoshta po marrin masa që tani që të të ardhmen jo të largët kur të bëhën bujtës të atyre qelive të paktën mos lagen… Vëngu llërëpërveshur në verë pas zjarreve që dogjën gjysmën e vendit tashmë me çizme deri në gju po vërdalliset në “liqejtë e përmbytjeve”, duke u shpallur herë si zjarrfikës e herë si punëtor komunaleje!/
