Prokuroria e Tiranës ka regjistruar vetëm tre procedime penale lidhur me dëmtimet e shkaktuara protestuesve gjatë javës së fundit,...
INVESTIGIME
Dinastia Sako – nga Garda te Bashkia: tentakulat familjare që kërkojnë të zgjaten deri në pushtetin vendor
PiranjatPërditësimi i fundit 7 Tetor 2025, 17:31
Në zgjedhjet për Bashkinë e Tepelenës, në garë nuk është vetëm një kandidat politik — por një emër që lidhet ngushtë me pushtetin dhe paratë publike. Gramoz Sako, ish-komandant i Gardës së Republikës, ka vendosur të kandidoi në bashkinë e Tepelenës, ndërsa paralelisht kompania e vëllait të tij përfiton miliona euro nga tenderët shtetërorë. Një dinasti familjare me tentakula që shtrihet nga institucionet e sigurisë te kontratat publike, e që tani kërkon të zgjerojë ndikimin edhe në pushtetin vendor.
2T shpk, kompania e njohur për ndërtimin e banesës së kryeministrit Edi Rama në Surrel, zotërohet nga Artan Sako (vëllai i Gramoz Sakos) dhe Dritan Troski.
Por emri i familjes Sako nuk lidhet vetëm me ndërtimin e rezidencës luksoze të kreut të qeverisë.
“2T” shpk është shpallur fituese e një tenderi gjigand prej 11.7 milionë eurosh për mirëmbajtjen e rrugëve të Rajonit Qendror dhe Juglindor për katër vite, të zhvilluar nga Autoriteti Rrugor Shqiptar.
Në këtë garë mori pjesë vetëm një kompani — “2T” — e cila fitoi me një ofertë sa 99.9% e fondit limit, duke e futur automatikisht tenderin në kategorinë e atyre me “flamur të kuq”.
Kjo ndodhi disa muaj përpara se Gramoz Sako të shpallte kandidaturën e tij për Bashkinë e Tepelenës. Një rastësi? Apo një zinxhir influencash që tregon se si pushteti ekonomik dhe ai politik ecin dorë për dore?
Në Shqipëri, tenderët me një pjesëmarrës të vetëm janë shndërruar prej vitesh në një mekanizëm të favorshëm për kompani të lidhura me politikën. Vetë Kontrolli i Lartë i Shtetit, në raportin e vitit 2021, vlerëson se dëmi ekonomik i shkaktuar nga institucionet arrin në 616.5 milionë euro, ku pjesa më e madhe vjen nga shkeljet në përdorimin e fondeve publike dhe prokurimet pa garë reale.
Ndërsa SPAK ka arrestuar zyrtarë për shpërdorim fondesh, kompani si “2T” vazhdojnë të fitojnë miliona në tenderë me garë të munguar — një praktikë që, në çdo vend normal, do të ishte arsye për hetim të thelluar.
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi sipas nenit 179 të Ligjit 35/2016
