Kryetari i PD-së, Sali Berisha i bëri thirrje maxhorancës të anulojë një anti-miting të paralajmëruar për ta mbaj...
INVESTIGIME
Kur shteti bën “cirk” me Cirkun
PiranjatPërditësimi i fundit 28 Prill 2023, 21:32
Na ishte njëherë Cirku! Arena, në të cilën fëmijët e kryeqytetit magjepseshin me prestigjatorët, kllounët dhe numrat e rrezikshme të akrobatëve. Prej 20 tetorit të vitit 2021 çadra e Cirkut u ul, duke e lënë trupën e artistëve, që të performojë rrugëve të kryeqytetit. Aktualisht, ata po perfomojmë cipëza nga repertori i tyre në një sallë të improvizuar, brenda një qendre tregëtare.
Kanë kaluar 18 muaj, që nga prishja e çadrës të Cirkut Kombëtar. Po për artistët e institucionit historik 64 vjeçar, që kanë dhënë me mijëra shfaqje, ajo skenë është ende e dhimbshme, si të kishte ndodhur sot. Menjëherë pas vendimit gjyqësor për mbylljen e çadrës së Cirkut, Zyra Përmbarimore konfiskoi ambientet si dhe materialet e Cirkut, pasi truallit ku ishte vendosur çadra i doli pronari. Konflikti mes institucioneve shtetërore dhe pronarëve të trualllit zgjati plot 7 vjet përfundoi me vendosjen e shiritit te Arena, duke bllokuar njëherë e mirë aktivitetin e artistëve. Po disa nga mjeshtërit e cirkut e mendojnë ndryshe. Sipas tyre, përgjegjësia kryesore bie mbi institucionet shtetërore. Drejtuesit e tyre duhet të kishin marrë masa më herët ose mund të kishin gjetur gjuhën e përbashkët, me pronarët e truallit. Dhe meqë nuk bënë as njërën as tjetrën, pasojat dihen.
E ndërsa premtimet për një cirk të ri lakoheshin nga titullarët e Ministrisë së Kulturës së asaj kohe, aq lehtësisht sa mund realizohej një numër iluzioni, në të vërtetë dukej se ata nuk kishin asnjë plan tranzicioni, se çfarë do të ndodhte me trupën e artistëve dhe të ardhmen e Cirkut në vend. Pas një viti e gjysmë pa një çadër dhe pa asnjë shpresë për të ardhmen duket se ‘zhonglimet’ e Ministrisë së Kulturës me akrobatët e Cirkut arritën në një nivel tjetër. Si për t’iu mbyllur gojën artistëve, ky institucion i strehoi ata në një ambient brenda një qendre tregëtare në kryeqytet, që vetëm për një trupë cirku nuk mund të përshtatet.
Të stërvitur me xhonglime dhe kllounada, nga institucionet shtetërore, duket se artistët e cirkut janë forcuar akoma më tepër, pavarësisht kushteve të vështira, në të cilat punojnë. E rëndësishme për ta është që fituan betejën me Ministrinë e Kulturës për Statusin e artistit kombëtar. Statusin e shpëtuan por sa i takon truallit për të vendosur çadrën në periferi të kryeqytetit, përgjigja e bashkisë së Tiranës ia ka prerë shpresat. Edhe një pronë pranë Liqenit Artificial, që iu dha nga Ministria e Kulturës në 2013, sot funksionon si parking.
Mesazhet e artistëve të Cirkut ende nuk kanë marrë një përgjigje konkrete nga institucionet. Të zhgënjyer dhe të dëshpëruar për situatën ata po përpiqen të vijojnë aktivitetin, duke performuar copëza nga repertori i tyre, në një ambient që vetëm arenë cirku nuk mund të jetë. E ndërkohë cirku i vërtetë po luhet në zyrat e atyre, që duhet të marrin një vendim për këta mjeshtra të argëtimit. Fatkeqësisht, një cirk të tillë, edhe ata që kanë një jetë me cirkun, nuk e kishin menduar.
