Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
KOSOVA
"Ka thelluar paqartësinë politike në vendin më të ri të Evropës"/ Mediat botërore jehonë 'dështimit' të Kurtit për formimin e qeverisë
PiranjatPërditësimi i fundit 26 Tetor 2025, 17:01
Dështimi i kryeministrit në detyrë të Kosovës, Albin Kurti, për të siguruar mbështetjen parlamentare për formimin e qeverisë së re ka tërhequr vëmendjen e mediave ndërkombëtare, të cilat theksojnë pasojat e mundshme të kësaj krize politike, duke përfshirë mundësinë e zgjedhjeve të parakohshme.
Reuters ka raportuar se parlamenti i Kosovës nuk e zgjodhi Kurtin si kryeministër, duke i hapur rrugë mundësisë për zgjedhje të reja. Agjencia thekson se opozita, përfshirë PDK-në, LDK-në dhe AAK-në, votoi kundër kandidaturës së Kurtit, duke e kritikuar atë për menaxhimin e marrëdhënieve me aleatët perëndimorë dhe për veprimet në veriun e Kosovës, ku jeton pakica serbe. Reuters vëren se Kurti erdhi në pushtet në vitin 2021, kur Lëvizja Vetëvendosje fitoi mbi 50% të votave dhe siguroi shumicën e duhur në Kuvend, por tani Kosova mund të përballet me një krizë politike të thelluar.
Bloomberg gjithashtu ka raportuar për këtë krizë, duke theksuar se vendi mund të shkojë drejt zgjedhjeve të parakohshme pas dështimit të Kurtit për të marrë mbështetje për kabinetin e tij. Mediumi amerikan shkruan se, ndërkohë që deputetët u mblodhën në orët e fundit të afatit kushtetues për krijimin e qeverisë, Kurti nuk arriti të merrte miratimin për përbërjen e ministrave. Ai kishte paralajmëruar se një qeveri e paformuar mund të çonte në bllokimin e buxhetit, vonesa të pagave publike dhe furnizimeve mjekësore, duke theksuar se shumë agjenci shtetërore funksionojnë pa mbikëqyrje për shkak të vakumit politik.
Ndërkaq, TRT World ka shkruar se Kurti nuk arriti të sigurojë votat e nevojshme për të formuar qeverinë, duke marrë vetëm 56 vota, pesë më pak se shumica e kërkuar prej 61 deputetësh. Ky dështim ka thelluar paqartësinë politike në Kosovë dhe ka lënë të hapur mundësinë e një raundi të dytë votimi. Sipas TRT World, tani presidentja e Kosovës duhet të emërojë një kandidat tjetër për një votim të dytë, por mbetet e paqartë nëse Kurti mund të rikandidojë ose nëse do të propozohet një përfaqësues nga opozita. Në rast se as raundi i dytë nuk sjell shumicën e kërkuar, Kosova mund të detyrohet të shkojë në zgjedhje të reja.
