Të gjithë drejtorët paraardhës të Ami Kozelit në Autoritetin Rrugor Shqiptar janë në burg, në arrest shtëpiak,...
LIFESTYLE
CNN: Si shqiptarët robëruan dy kafshë në Veri! Luani dhe ariu shpëtohen nga organizata të huaja
PiranjatPërditësimi i fundit 19 Dhjetor 2025, 17:50
Një luan dhe një ari të shpëtuar nga robëria në veri të Shqipërisë mbërritën në strehëza për kafshë në Gjermani në fillim të dhjetorit, pasi autoritetet në Tiranë zbuluan se ata po mbaheshin ilegalisht si kafshë shtëpiake në një pronë private.
Erion, një luan 3-vjeçar, dhe Flora, një ari 2-vjeçar, tani po fillojnë të dy një jetë të re.
“Jemi shumë të lumtur që autoritetet i konfiskuan kafshët dhe që tani kemi mundësinë t’i çojmë në Gjermani, ku mund të fillojnë nga e para dhe të jetojnë në kushte të përshtatshme për speciet e tyre,” tha Magdalena Scherk-Trettin, menaxhere në organizatën ndërkombëtare për mirëqenien e kafshëve Four Paws.
Një ekip nga Four Paws kreu shpëtimin pasi Agjencia Kombëtare e Pyjeve e Shqipërisë lokalizoi luanin bazuar në videot e publikuara nga pronari i tij në TikTok. As autoritetet dhe as organizata nuk e kanë bërë publik emrin e personit që i mbante kafshët si kafshë shtëpiake.
Veterinerët kryen anestezi para se kafshët të ngarkoheshin në kafaze për udhëtimin e tyre të gjatë drejt shtëpive të reja. Më 13 dhjetor, ata përfunduan një udhëtim 70-orësh nëpër disa vende evropiane, me Erionin që tani është strehuar në një strehë për kafshë të egra në juglindje të Gjermanisë dhe Florën në një strehë për arinj në veri të vendit, tha Four Paws. Organizata tha se të dy kafshët ishin në gjendje jo të mirë.
“Një kontroll fillestarpërcaktoi se Flora është e kequshqyer dhe ka probleme dentare, ndaj plani i saj i rikuperimit ka nisur tashmë,” tha organizata.
Ndërsa kur Erioni u shpëtua, krifja e tij kishte rënë, për arsye që veterinerët ende nuk kanë qenë në gjendje t’i përcaktojnë, shtoi ajo. Pavarësisht udhëtimit të vështirë, shpëtimi ia vlejti, tha Scherk-Trettin. “Jemi të kënaqur të shohim këto kafshë teksa nisin jetën e tyre të re.”
Tregtia ilegale e jetës së egër mbetet një problem sistemik në Shqipëri dhe në mbarë rajonin, ku veçanërisht arinjtë, si edhe kafshë ekzotike, mbahen në kafaze në restorante ose në prona private me pak ose aspak kujdes profesional. Origjina e Erionit dhe Florës mbetet e paqartë. Four Paws tha se beson që luani është viktimë e trafikimit ilegal të jetës së egër, ndërsa ariu ka shumë gjasa të jetë gjuajtur ilegalisht nga natyra.
“Ky shpëtim nxjerr në pah nevojën urgjente të Shqipërisë për të luftuar tregtinë ilegale të jetës së egër dhe mbajtjen private të kafshëve,” tha organizata në një deklaratë.
Legjislacioni i dobët, boshllëqet ligjore dhe zbatimi i dobët i ligjit kanë kontribuar në përhapjen e gjerë të robërisë private dhe tregtisë së kafshëve të egra në Shqipëri, sipas Four Paws, e cila vlerëson se më shumë se 60 mace të mëdha ende mbahen në kushte të këqija në vend.
Ligji shqiptar lejon individët ose organizatat të mbajnë ekzemplarë të kafshëve të egra nëse ato kanë lindur në robëri — për shembull në një kopsht zoologjik ose në një strukturë të specializuar. Speciet jo-vendase të lindura jashtë Shqipërisë mund të mbahen gjithashtu nëse sigurohen dokumente që provojnë se janë marrë nga qendra të specializuara të shumimit dhe tregtimit.
Sajmir Shehu, menaxher projekti në Four Paws, tha se ligjit i mungon një kuadër i rreptë mbi bazën e të cilit organizata si e tija mund të parandalojnë mbajtjen e kafshëve të egra në robëri. Ligji gjithashtu lejon konfiskimin e kafshëve nëse standardet e mirëqenies ose veterinare nuk përmbushen, por nuk parashikon asnjë sanksion për pronarët e kafshëve ekzotike./piranjat.news
