Komisioni Europian po shqyrton mundësinë e një “Akti për Ujin”, i cili do të vendoste një kuadër më të...
LIFESTYLE
Gruaja humbet të gjitha gjymtyrët pasi qeni i lëpiu plagën
PiranjatPërditësimi i fundit 22 Shkurt 2026, 13:34
Manjit Sangha, 56 vjeç, kaloi 32 javë në spital dhe pësoi gjashtë arreste kardiake, pasi një rast i rëndë sepsisi e detyroi t’i nënshtrohej një amputimi të katërfishtë, duke humbur të gjitha gjymtyrët. Mjekët besojnë se infeksioni mund të jetë shkaktuar nga diçka aq e pafajshme sa një lëpirje e qenit të saj mbi një plagë të vogël.
“Është e vështirë ta përshkruaj përvojën. Humbja e duarve dhe këmbëve brenda një periudhe kaq të shkurtër kohore është diçka shumë serioze”, deklaroi ajo për BBC. “Është shumë serioze dhe askush nuk duhet ta marrë lehtë.”
Gruaja u ndje keq një pasdite të diel dhe u gjet pa ndjenja mëngjesin pasues, me këmbë të ftohta, buzë të mavijosura dhe vështirësi në frymëmarrje. Bashkëshorti i saj, Kam Sangha, 60 vjeç, e përshkroi situatën duke thënë: “Isha në panik. Si mund të ndodhë diçka në më pak se 24 orë?”
Gjatë shtrimit në njësinë e kujdesit intensiv të New Cross Hospital në Wolverhampton, zemra e saj ndaloi gjashtë herë. Sepsisi shkaktohet kur sistemi imunitar reagon ndaj një infeksioni dhe sulmon indet dhe organet e vetë trupit. Në Britani, rreth 50 mijë persona humbin jetën çdo vit nga sepsisi, sipas UK Sepsis Trust. Ndërsa gjendja e saj u përkeqësua, Manjit Sangha iu nënshtrua amputimit të të dyja këmbëve poshtë gjunjëve, si edhe të të dyja duarve, ndërsa iu desh gjithashtu t’i hiqej shpretka, duke u përballur njëkohësisht me pneumoni dhe gurë në tëmth.
Bashkëshorti i saj, Kam Sangha, i punësuar në shpërndarjen e produkteve, ka qëndruar jashtë pune për shtatë muaj, duke mbështetur gruan e tij, të cilën e përshkruan si “jashtëzakonisht të fortë”. “Çdo ditë na tregoi se mund t’ia dilte”, shton ai.
Çifti, i cili festoi 37-vjetorin e martesës brenda në spital, ka nisur një fushatë për mbledhje fondesh për proteza të avancuara dhe për rritjen e ndërgjegjësimit mbi rreziqet e sepsisit. Deri më tani, ata kanë mbledhur mbi 27 mijë paund përmes GoFundMe dhe nismave në Screwfix. Manjit, ish-farmaciste, shprehet e vendosur të ecë sërish dhe të rikthehet në punë: “Kam qëndruar mjaftueshëm në shtrat dhe në karrige. Tani ka ardhur koha të ec.” /PiranjatNews/
