Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
POLITIKE
'AI do e quante regjim'/ Bushati: Kur as drejtësia dhe as media nuk funksionojnë, demokracia ka vdekur
PiranjatPërditësimi i fundit 30 Shtator 2025, 08:23
Gazetari Andi Bushati, i ftuar në emisionin “Çim Peka Live” në Syri TV, u shpreh se Shqipëria nuk funksionon më si një shtet demokratik, por si një regjim ku pushteti, krimi i organizuar dhe media e kapur bashkëpunojnë për të shantazhuar edhe investitorët e huaj.
Duke komentuar raportin ndërkombëtar që ngre alarmin për kapjen e shtetit, Bushati theksoi se vetë përmendja e mediave si pjesë e këtij shantazhi është e tmerrshme, pasi dëshmon një realitet ku askush nuk gjen drejtësi.
Sipas tij, në Shqipëri është shuar çdo mekanizëm për mbrojtjen e individit: as drejtësia, as media dhe as pushteti nuk ofrojnë zgjidhje. “Sikur këto fakte t’i fusje në një program inteligjence artificiale dhe t’i kërkoje të përcaktonte nëse ky është një shtet demokratik apo autokratikpërgjigjja do të ishte e qartë”, u shpreh Bushati.
Ai theksoi se raporti duhet të shërbejë si dëshmi tronditëse për faktin se në Shqipëri, demokracia ka vdekur dhe se kjo situatë nuk është më çështje debati politik, por një realitet i dhimbshëm për çdo qytetar.
Pjesë nga deklarata:
Nga i gjithë raporti, që ka shumë gjëra të përsëritura, nënvizova një shprehje për investitorët e huaj që shantazhohen njëkohësisht nga administrata, media dhe krimi i organizuar. Vetë fakti që përfshin edhe ne, mediat, është i tmerrshëm.
Nuk do të ndalem te kjo, por do të ndalem te çfarë pasqyre është kjo renditje. Në një shoqëri demokratike, kur të kërcënon ose një kriminel ose një punonjës i shtetit, ose do të shkosh të denoncosh në media, ose do të shkosh te drejtësia. Kur as mediat dhe as gjykatat nuk të japin zgjidhje, atëherë unë them: edhe sikur të mos kishim opozitë dhe qeveri, por t'i fusnim këto të dhëna në një inteligjencë artificiale dhe t’i thonim: “Në një vend ku një biznesmen kërcënohet dhe nuk gjen të drejtën në asnjë gjykatë a është ky një vend demokratik apo një regjim autokratik?” nuk kam bërë testin, por çdo program me AI e gjen menjëherë se çfarë është demokracia.
Ne nuk jetojmë më në demokraci. Por, sa më shumë vazhdojmë të debatojmë për këtë, aq më shumë fakte mblidhen në këtë drejtim. Nëse një biznesmen, që ka edhe fuqinë e parasë, nuk gjen të drejtën, po një qytetar i thjeshtë ku do ta gjejë atë?
Të marrim raportin dhe ta bëjmë pjesë të debatit, ta përshtatim për çfarë na intereson ne sepse ai është një vërtetim i qartë që, fatkeqësisht, këtu demokracia ka vdekur.
