Nga Lutfi Dervishi
Një protestë nuk është thjesht një listë akuzash ndaj pushtetit. Kur zgjat më shumë se një muaj...
POLITIKE
'Akuza serioze ndaj qeverisë Rama'/ Zhulali: SHBA kërkon hetim për lidhjet e qeverisë shqiptare me narkotrafikun
PiranjatPërditësimi i fundit 3 Korrik 2026, 22:00
Anëtarja e kryesisë së Partisë Demokratike, Ilda Zhulali komentoi një zhvillim të raportuar ndërkombëtar që lidhet me një nismë të kongresmenit amerikan Joe Wilson.
Sipas saj, bëhet fjalë për një propozim amendamenti në Aktin Kombëtar të Mbrojtjes në SHBA, i cili do të kërkonte nga Departamenti i Shtetit dhe strukturat e inteligjencës amerikane një hetim dhe raportim mbi lidhjet e pretenduara mes qeverisë shqiptare dhe trafikut ndërkombëtar të narkotikëve, si dhe mbi çështje të tjera të lidhura me situatën politike në vend.
Zhulali e cilësoi këtë nismë si një zhvillim të rëndësishëm në marrëdhëniet ndërkombëtare, duke theksuar se, sipas saj, përfshirja e një çështjeje të tillë në një akt të Kongresit amerikan përbën një precedent të veçantë për një vend anëtar të NATO-s.
Ajo shtoi se propozimi është ende në proces shqyrtimi në Kongres dhe pritet të kalojë në seancë plenare, ku do të diskutohet më tej dhe do të vlerësohet mbështetja e mundshme bipartizane.
Në intervistë, Zhulali theksoi gjithashtu se në nismë përfshihet edhe kërkesa për raportim mbi, siç u shpreh ajo, çështje të përndjekjeve politike në Shqipëri, duke e lidhur këtë me vlerësimin më të gjerë politik të situatës në vend.
Gazetarja: Zhvillime të rëndësishme edhe ndërkombëtarisht në rrafshin e gjithë 34 ditëve të protestave në Shqipëri. Ilda, sigurisht përtej atyre lajmeve ndërkombëtare që vijojnë të jenë në qendër të vëmendjes në mediat shumë prestigjioze, madje dhe pak minuta më parë isha duke parë një nga mediat e Shteteve të Bashkuara të Amerikës që kishte ardhur, kishte bërë edhe një reportazh, sapo e kishte publikuar madje në rrjetet sociale. Vjen një lajm i rëndësishëm në një nivel më të lartë. E kam fjalën këtu pikërisht për kongresmenin Joe Wilson, i cili ka propozuar, po e lexoj më saktësisht që të jem e qartë dhe për ata që nuk e kanë informacionin, një ligj i cili kërkon nga ana e Sekretarit të Shtetit dhe strukturave të inteligjencës amerikane, hetim dhe raportim mbi lidhjet dhe lehtësimin që qeveria Rama i ka bërë trafikut ndërkombëtar të kokainës. E lexova me shumë kujdes në mënyrë që mos të ndalem unë te interpretimi, por të na e sqarosh ti. Çfarë është kjo në informacionin tënd dhe këndvështrimin tënd?
Ilda Zhulali: Po, ky është një lajm shumë i rëndësishëm, lajmi i dytë ose i tretë shumë i rëndësishëm që na vjen ndërkombëtarisht lidhur edhe me atë çfarë po ndodh në Shqipëri dhe që ka një peshë shumë të madhe për këtu. Ky është një propozim, një amendim i aktit kombëtar të mbrojtjes që vjen nga...
E para ky është një akt i paprecedent, nuk ka ndodhur asnjëherë që për një vend anëtar të NATO-s, të vijë një kërkesë e tillë në Kongresin Amerikan dhe të prezantohet në formën e një amendimi të ligjit. Kongresmeni Wilson ka bërë një propozim për ta amenduar aktin kombëtar të mbrojtjes, duke shtuar një amendament që e bën operacional zbatimin e ligjit dhe ka kërkuar që për Shqipërinë të kërkohet një hetim dhe raportim i hollësishëm nga Departamenti i Shtetit bashkë me Drejtorinë e Inteligjencës, për të zbuluar lidhjet me narkotrafikun dhe qeverinë shqiptare. Kështu që kjo është, një akt në vetvete është shumë i rëndë, dhe thashë e bën edhe më të rëndë fakti që bëhet fjalë për një vend anëtar të NATO-s.
Dhe e dyta është sepse kjo nuk ka ndodhur ndonjëherë jo vetëm për Shqipërinë, por për asnjë vend tjetër. Gjithmonë aty diskutohet për çështje që përbëjnë kërcënim për sigurinë e Shteteve të Bashkuara të Amerikës dhe përfshirja e Shqipërisë në këtë formë, pra kërkesa për një hetim dhe raportim për çështjet e lidhjes së narkotrafikut me qeverinë shqiptare, tashmë konsiderohet si një çështje e sigurisë kombëtare të Shteteve të Bashkuara të Amerikës. Dhe kjo është në një farë mënyre aktakuza më e rëndë dhe njolla më e rëndë që vendoset në marrëdhëniet mes dy vendeve tona. Patjetër që ky amendament është ende në proces shqyrtimi brenda Kongresit, do të shqyrtohet në seancë plenare, tashmë në Kongres, por ajo që është si të thuash më së paku, kjo çështje do të jetë pjesë e një diskutimi shumë të madh në Kongresin Amerikan. Do të shikojmë nëse kjo do të jetë pastaj, do të përqafohet në mënyrë bipartizane qoftë nga republikanët po ashtu dhe nga demokratët, dhe çfarë rrjedhe do të marrë më tej. Por në momentin që flasim, ajo që dimë me siguri është që kjo çështje do të merret në shqyrtim në seancën e radhës në seancë plenare në Kongresin Amerikan.
Gazetarja: Dhe tashmë ne dimë që kanë kaluar, apo jo, komisionin e rregulloreve dhe komisionin e ligjeve të Shteteve të Bashkuara të Amerikës. Tani këtu ka pasur qëndrim, po e quajmë po përmend të njëjtin term, bipartizan apo jo, në këto dy organizma ose në këto dy hapa të kaluara tashmë, në këto dy shkallë të kaluara tashmë?
Ilda Zhulali: Deri tani janë ezauruar hapat e komisioneve, prandaj po them që tashmë ajo do të kalojë në seancë plenare, ku edhe do të ketë një diskutim edhe më të hollësishëm aty. Secila palë do të paraqesë argumentet e veta dhe me shumë gjasë të dyja palët do të jenë në mbështetje të këtij amendimi.
Por doja të thoja dhe një element tjetër që është pjesë e këtij propozimi, që bashkë me kërkesën për të hetuar lidhjet e narkotrafikut me qeverinë shqiptare, ka dhe një kërkesë tjetër për të dhënë llogari në lidhje me përndjekjet politike dhe shtypjen politike të qeverisë në Shqipëri. Të dyja këto bashkë i japin trajtë asaj që ne e kemi përshkruar shumë herë si narkoshteti, që është dhe autokracia e Edi Ramës që ka ndërtuar për gjithë këto vite në Shqipëri, duke i dhënë edhe trajtat e narkoshtetit. Kështu që kjo i bën bashkë autokracinë dhe narkoshtetin në një propozim të vetëm për t'u shqyrtuar dhe për të marrë dhe një, si të thuash, vlerësim përfundimtar politik në nivelin e Kongresit nga Shtetet e Bashkuara të Amerikës.
Por kjo është e ndërthurur dhe me agjencitë e tjera, me Departamentin e Shtetit, pra merr edhe nivel ekzekutiv, edhe forcë ekzekutive, pasi përfshin dhe nivelin ekzekutiv në këtë propozim. Me detyrimin që kur ky akt të miratohet, brenda 180 ditëve, jo më larg, pra si 6 muaj, duhet të ketë një raportim të hollësishëm nga Departamenti Amerikan i Shtetit bashkë me Drejtorinë e Inteligjencës në Shtetet e Bashkuara të Amerikës.
