Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
Kodi i ri Penal në Shqipëri shqetëson Bashkimin Evropian: Ndikim afatgjatë në Shqipëri
PiranjatPërditësimi i fundit 22 Shtator 2025, 20:01
Pas prezantimit të parë të Kodit të Ri Penal më 25 korrik dhe diskutimeve të përsëritura nga Ministria e Drejtësisë, disa nga dispozitat e reja vijojnë të ngjallin debat, veçanërisht ato që prekin lirinë e shprehjes dhe shpifjen.
Bashkimi Evropian konfirmon se aktualisht po analizon ndryshimet, por shpreh shqetësim për disa prej dispozitave të reja që mund të cenojnë lirinë e medias dhe të drejtat e qytetarëve.
“Ne jemi në dijeni të shqetësimeve serioze të shprehura nga përfaqësues të sektorit të drejtësisë, si edhe nga shoqëria civile, në lidhje me një sërë projekt-ndryshimesh. Ne jemi veçanërisht të shqetësuar për disa amendamente të propozuara nga grupi i punës që mund të kenë ndikim negativ mbi të drejtat e qytetarëve, lirinë e shprehjes dhe lirinë e medias. Këto dispozita nuk janë të përafruara me standardet e BE-së dhe ne jemi të bindur se, në kuadër të procesit të konsultimit dhe në kuadër të angazhimeve për anëtarësimin, këto shqetësime do të adresohen”.
Ndërsa drafti i plotë i Kodit është ende në proces konsultimi publik, Bashkimi Europian kërkon që ky proces të jetë i gjerë, gjithëpërfshirës dhe me pjesëmarrje të të gjithë aktorëve, nga institucionet e drejtësisë, tek shoqëria civile dhe media.
“Ky rishikim më i gjerë i Kodit Penal është një ndërmarrje komplekse, me ndikim të mundshëm afatgjatë në shoqëri dhe në sistemin e drejtësisë penale. BE-ja thekson rëndësinë e garantimit të një konsultimi gjithëpërfshirës dhe të plotë me të gjitha institucionet kryesore të drejtësisë dhe aktorët e sundimit të ligjit, si edhe me shoqërinë civile dhe të gjithë aktorët e tjerë përkatës, me qëllim që legjislacioni që do të rezultojë të jetë i cilësisë më të lartë”, thuhet në reagim për Tch.
Në përgjigjen e tij Bashkimi Evropian thotë se inkurajon Shqipërinë t’i japë përparësi ndryshimeve ligjore të lidhura me Kodin Penal që janë të nevojshme për të përmbushur kriteret ndërmjetëse të përcaktuara në Qëndrimin e Përbashkët të BE-së.
