Presidenti i Federatës Palestineze të Futbollit, Jibril Rajoub, ka deklaruar se nuk ka marrë vizë për të hyrë në Shtet...
POLITIKE
Ndryshimet penale nga PS/ Meta: Rama nuk do t’i shpëtojë drejtësisë popullore, fundi i tij si i akrepit
PiranjatPërditësimi i fundit 18 Shkurt 2026, 12:12
Presidenti i Partisë së Lirisë, Ilir Meta, ka dhënë një intervistë ekskluzive për portalin mediatik Syri.net, ku ka folur për zhvillimet e fundit politike, ndërhyrjen e kryeministrit Edi Rama në Kodin e Procedurës Penale, si dhe aksionin e opozitës.
Në intervistë, Meta theksoi se Rama nuk do t’i shpëtojë drejtësisë popullore dhe se fundi i tij do jetë si i akrepit.
Intervistë ekskluzive e Presidentit të Partisë së Lirisë, Z. Ilir Meta dhënë për portalin Syri.net:
Pyetje: Z. Meta, si e vlerësoni iniciativën e fundit të Z. Rama për ndryshimin e Kodit të Procedurës Penale për të shmangur pezullimin e anëtarëve të Qeverisë nga shkarkimi?
Meta: Si një heqje maskash meqenëse festat e karnavaleve sapo kanë përfunduar.
Si një sjellje tipike e diktatorëve afrikanë që pasi vjedhin çmendurisht pasuritë e popujve të tyre, duan të garantojnë përjetësinë e pushtetit të tyre më shumë se sa një mënyrë për të gëzuar pasuritë dhe diamantet e vjedhura për të garantuar paprekshmërinë nga drejtësia për veten dhe familjarët e tyre.
Pyetje: A besoni se këto ndryshime do e mbrojnë Ramën nga drejtësia?
Meta: Rama ka karakterin dhe do ketë fundin e akrepit. Cilido që ka bërë dhe do të bëjë bretkosën duke e ndihmuar për të shtyrë ditët e tij në pushtet, do ketë një fund të merituar për vete.
Edhe nëse Rama do i kishte legjitime 84 votat për të ndryshuar Kodin Penal, ato jo vetëm do të ishin të njëanshme dhe në kundërshtim me frymën e ndryshimeve kushtetuese të 22 korrikut 2016, por edhe në kundërshtim me ndryshimet e vitit 2012 për të dobësuar imunitetin e të zgjedhurve dhe funksionarëve përpara drejtësisë.
Aq më tepër, të gjithë e dinë se një pjesë e madhe e mandateve të tij janë të vjedhura hapur edhe falë mosveprimit të drejtësisë, ndaj krimeve elektorale.
Shikoni në Kosovë se sa komisionerë u proceduan dhe dënuan për ndërhyrje në procesin e numërimit?
Pyetje: Po në Shqipëri?
Meta: Ndaj jemi kaq larg demokracisë funksionale dhe llogaridhënies në raport me Kosovën, që dje festoi 18-vjetorin e Pavarësisë.
Prandaj, vetëm në vitin e fundit kemi humbur 11 vende në renditjen botërore të Transparency Internacional lidhur me korrupsionin.
Me këto ndryshime që kërkon të bëjë ai, jo vetëm që nuk do t’i shpëtojë drejtësisë popullore, por është vetëshpallur botërisht si kryehajduti i sektit rilindas që tani ka tmerr edhe nga drejtësia që kapi vetë në mënyrë antikushtetuese.
Pyetje: A mund të cënojë kjo integrimin europian të vendit?
Meta: Kjo cënon së pari sigurinë dhe mirëqenien e qytetarëve shqiptarë që vidhen në mënyrë të përbindshme nga sekti rilindas.
Kjo nxit shpopullimin e Shqipërisë.
Rama përherë ka qenë pengues dhe vonues i integrimit europian të vendit.
Por tani, më i rëndësishëm se çdo qëllim tjetër është ndalimi i shpopullimit dhe shpërbërjes së kombit, shoqërisë dhe familjes shqiptare.
Largimi i Edi Ramës zhbllokon automatikisht edhe integrimin europian të Shqipërisë.
Ndaj të gjithë të thonë fjalën e tyre në 20 Shkurt.
Pyetje: Ndërkohë Edi Rama ka lajmëruar se në 19 Shkurt do të jetë i ftuar në Bordin e Paqes në Uashington. A e shikoni këtë si një mbështetje për të?
Meta: Edhe Z. Nano ka qenë si Kryeministër i Shqipërisë, bashkë me kolegë të tjerë në Shtëpinë e Bardhë, në kuadër të koalicionit për "Irakun e Lirë".
Por pas disa muajsh kaloi në opozitë.
Lidhja e eventeve të tilla formale me mbështetjen personale, është një abuzim i vazhdueshëm i Edi Ramës, i provuar se ka kogrruptuar edhe agjentin e larte të FBI, Charles McGonigal, për të përdorur drejtësinë amerikane dhe shqiptare si armë politike kundër opozitës.
Në Shtëpinë e Bardhë ka hyrë edhe Z. Saimir Tahiri pak kohë para se të shkarkohej nga Ministër i Brendshëm.
Ndaj opozita nuk duhet t’i kushtojë rëndësi shpërqëndrimeve që provokon Rama, por duhet të ngrejë frymën e revoltës kundër korrupsionit skizofrenik të Edi Ramës, i cili do ta tërheqë atë në fund të "pusetës" që nuk mbyllet dot më.
