Kryeministri Edi Rama duke u ndalur te ligji për zonat e mbrojtura, deklaroi se çdo nismë është bërë me miratimin e BE, p...
POLITIKE
“Prokurori i dosjes u kërcënua nga Lubi Balluku dhe Rama”/ Berisha: Kryeministri po mbron korrupsionin e tij dhe të karteleve
PiranjatPërditësimi i fundit 26 Mars 2026, 13:47
Kreu i Partisë Demokratike, Sali Berisha, tha sot nga konferenca për shtyp se prokurori i dosjes së zv/kryeministres Belinda Balluku, e shkarkuar, pezulluar dhe e pandehur nga drejtësia, “është kërcënuar” në forma të ndryshme.
Jo vetëm u pengua me hetimet, por më pas mori edhe kërcënime sipas liderit të opozitës, dhe këto i vinin nga “Lubi Balluku, Edi Rama dhe vrasës me pagesë”.
“Prokurori zbatoi ligjin. Por ky prokuror është kërcënuar, është kërcënuar në mënyrën më të egër. Është kërcënuar nga vrasës të dërguar nga Lubi Balluku dhe Edi Rama, nga Rama vetë, nga të gjitha anët. Ky prokuror nuk është tërhequr, i ka qëndruar deri në fund ligjit, siç duhet t’i qëndrojë. Natyrisht SKPAP-i ka një numër, 20 prokurorë, 80 BKH-ista, sigurisht mes tyre ka njerëz që bëjnë ligjin dhe ka pastaj kriminelë më të këqij se çdo kriminel tjetër, që komunikojnë me Ramën, dekonspirojnë çdo hetim dhe janë të lidhur me kriminelët”, tha Berisha mes të tjerash.
Më tej ai akuzoi kreun e ekzekutivit se është i aftë të bëjë çdo gjë për të mbrojtur aferat e tij korruptive dhe të qeveritarëve të tjerë.
“Kjo dëshmojë se Rama është i aftë për të mbrojtur çdo veprim korruptiv të tij dhe të bashkëpunëtorëve të tij. Ju e dini, më 2011 ish-zv/kryeministri Ilir meta dha dorëheqjen dh dorëzoi imunitetin para se ta kërkonte Prokuroria këtë. Për këta që thonë se shqiptarët e kanë korrupsionin si me thënë moral të tyre, ata që e thonë këtë kanë vetë moral korrupsioni me Ramën. Por shqiptarët kanë zbatuar Kushtetutën dhe ligjet, nuk kanë bllokuar kurrë Prokurorinë, në asnjë rast, cilatdo kanë qenë marrëdhëniet me të. Ndaj duhet pranuar se ‘de fakto’ SPAK nuk ekziston më, misioni i tij është hetimi dhe ndjekja penale e personave me imunitet dhe krimit të organizuar”, nënvizoi Berisha.
Në fund ai theksoi se nuk ka mënyrë tjetër përveç përballjes me protesta dhe ajo e radhës do ishte shumë shpejt.
“Ndaj nuk ka mënyrë tjetër përveç protestave dhe përballjes me ta. Protesta tjetër është shumë shpejt dhe do jetë shumë e fuqishme, rruga e vetme është protesta”, u shpreh kreu i opozitës.
