Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
POLITIKE
"Vuçiç tani do të donte të shkaktonte trazira në veri"/ Eurodeputeti kroat: Çdo destabilizim i Kosovës do t’i kushtonte shtrenjtë Serbisë
E.DPërditësimi i fundit 24 Prill 2025, 21:30
KROACI- Eurodeputeti kroat dhe raportuesi për Serbinë në Parlamentin Evropian, Tonino Picula, ka deklaruar se presidenti i Serbisë Aleksandar Vuçiç do të donte të shkaktonte trazira në veri të Kosovës. Por Picula thekson se Vuçiç nuk mund ta bëjë këtë pasi i ka shpenzuar të gjitha kreditë e tij pas inkursionit të grupeve paraushtarake serbe në Banjskë në vitin 2023.
Picula në një intervistë për portalin kroat Jutarnji list, tha se strategjia aktuale e Vuçiç synon destabilizimin, por pa përdorimin e drejtpërdrejtë të forcës. Picula vlerëson se çdo destabilizim i mundshëm në Kosovë tani do t’i kushtonte shtrenjtë Vuçiç dhe për këtë arsye ai është më i fokusuar në tensionet e brendshme politike dhe në provokimet ndaj Kroacisë.
Eurodeputeti kroat tha se Serbia nuk mund të bëhet anëtare e BE-së derisa të njohë pavarësinë e Kosovës dhe të heqë dorë nga politika e “botës serbe”. Gjithashtu ai shton se ndryshimet në qeveri në Serbi mbartin rreziqe për të cilat BE-ja mund të mos jetë e përgatitur, por paralajmëron se përdorimi i forcës nga Vuçiç mund të çojë në një ndryshim të qëndrimit të institucioneve evropiane ndaj tij.
“Vuçiç tani do të donte të shkaktonte trazira në veri të Kosovës, por ai i shpenzoi të gjitha kreditë e tij pas inkursionit të grupeve paraushtarake serbe në Banjskë në vitin 2023, kur u vra një polic i Kosovës. Vuçiç po përdor BE-në si bankomat. Qytetarët serbë janë të ekspozuar ndaj një narrative që favorizon lidhjet vëllazërore dhe miqësore me Pekinin dhe Moskën, ndërsa Perëndimi dhe BE-ja janë demonizuar.
Nëse nesër organizohet një referendum për hyrjen e Serbisë në BE, s’duhet pritur rezultat spektakolar. Prandaj dërgon banditë, provokatorë të ndryshëm, njerëz partiakë që duan ta dobësojnë atë dëshirë për protesta, por nuk ia del”, tha Picula.
Sakaq, në fillim të muajit maj Parlamenti Evropian do të votojë raportin e tij për situatën në Serbi, i cili radhit të gjitha çështjet e hapura që Serbia nuk po arrin t’i zgjidhë dhe që janë kritere për progres drejt anëtarësimit në BE.
