Ambasada e Shteteve të Bashkuara në Tiranë ka publikuar një njoftim ku paralajmëron qytetarët shqiptarë për përdo...
SPORT
Olav Koij triumfon në sprintin e etapës së pestë të Turit të Francës, Traen ruan fanellën e verdhë
PiranjatPërditësimi i fundit 10 Korrik 2026, 14:57
Olav Koij fitoi etapën e pestë të Turit të Francës 2026. Çiklisti holandez i skuadrës Decathlon triumfoi në sprintin final pas 158 kilometrash të përshkuara nga Lannemezan në Pau, duke mposhtur me diferencë minimale Maks Kanter (Astana) dhe Tim Merlier (Quick-Step).
Ishte një nga etapat me më pak vështirësi malore të këtij edicioni të Turit, me vetëm 1600 metra ngjitje të akumuluara, e menduar kryesisht për sprinterët dhe jo për pretendentët e renditjes së përgjithshme. Kjo e fundit mbetet e pandryshuar, pasi fanella e verdhë vazhdon të mbahet nga norvegjezi Torstein Traen i skuadrës Uno-X Mobility. Që etapa e pestë do të ishte një ditë tranzicioni nuk ishte befasi dhe skenari i parashikuar u konfirmua edhe në vijën e finishit në Pau.
Megjithatë, gara dhuroi një fitues të denjë, pasi Koij, një prej sprinterëve të favorizuar para nisjes së etapës, realizoi një shpërthim të shkëlqyer në kilometrat e fundit. Holandezi la pas Max Kanter të Astanas dhe Tim Merlier të Quick-Step në një sprint final ku konfigurimi i kilometrit të fundit nuk u përshtatej shumë disa prej favoritëve të tjerë.
Jasper Filipsen përfundoi i pesti, por pa qenë asnjëherë realisht në garë për fitoren, ndërsa Mads Pedersen, fituesi i etapës së katërt, nuk arriti të përsëriste suksesin e mëparshëm. Duhet theksuar edhe puna e madhe e Baptist Veistrofer nga Lotto-Intermarche, i cili qëndroi në arrati i vetëm për 144 kilometrat e para, duke udhëhequr thuajse 90 për qind të etapës, përpara se të kapej në momentin vendimtar të garës.
Në etapa të tilla është e pashmangshme të flitet për një renditje të ngrirë dhe pikërisht kështu ndodhi: nuk ndryshoi as lideri, me Torstein Traen që ruan vendi e parë, dhe as diferencat mes pretendentëve kryesorë. Tadej Pogaçar dhe Jonas Vingegard vazhdojnë të jenë së bashku me një disavantazh prej 7 minutash e 53 sekondash. Turi do të vazhdojë sërish nga Pau, ku etapa e gjashtë do të çojë pelotonin drejt GavarnieGedre. Do të jetë një provë malore e fortë, me një distancë gare prej 186,2 kilometrash.
