Deputetja e Partisë Socialiste, Elisa Spiropali, i është drejtuar me një letër publike kryeministrit Edi Rama, pas protestave të d...
AKTUALITET
Boshatiset bulevardi, protestuesit shpërndahen në rrugët e Tiranës pas ndërhyrjes së policisë
PiranjatPërditësimi i fundit 16 Tetor 2026, 19:31
Bulevardi “Dëshmorët e Kombit” është boshatisur nga protestuesit pas një tjetër ndërhyrjeje të forcave të policisë, të cilat kanë përdorur gaz lotsjellës dhe ujë me presion për shpërndarjen e turmës.
Pas disa orësh grumbullimesh dhe përplasjesh, protestuesit janë larguar nga bulevardi, por protesta nuk ka përfunduar. Grupe të rinjsh janë shpërndarë në rrugë të ndryshme të Tiranës, ndërsa pjesa më e madhe e demonstruesve është përqendruar në zonën e Parkut Rinia.
Në operacionin për lirimin e bulevardit kanë marrë pjesë forcat e Ndërhyrjes së Shpejtë dhe efektivët e njësisë “Shqiponja”, të mbështetur nga dy automjete ujëhedhëse.
Gjatë përplasjeve, protestuesit kanë hedhur gurë në drejtim të forcave të rendit dhe janë përpjekur të krijojnë barrikada për të penguar avancimin e automjeteve policore. Megjithatë, policia ka arritur të vijojë ndërhyrjen dhe të largojë turmën nga bulevardi.
Kjo ishte ndërhyrja e tretë e policisë gjatë mbrëmjes, pas përpjekjeve të mëparshme për të shpërndarë protestuesit me gaz lotsjellës dhe ujë me presion.
Ndryshe nga momentet e mëparshme, kur turma ishte rigrupuar në bulevard pas ndërhyrjeve, këtë herë një pjesë e konsiderueshme e protestuesve është zhvendosur drejt Parkut Rinia dhe rrugëve përreth.
Ndërkohë, në disa zona të kryeqytetit vijojnë të dëgjohen thirrje të të rinjve për t'u bashkuar me protestën, çka tregon se mobilizimi nuk është ndërprerë pavarësisht largimit të turmës nga bulevardi.
Dita e katërt e protestave studentore është shoqëruar me përplasje të vazhdueshme mes demonstruesve dhe policisë. Në qendër të kërkesave të protestuesve mbetet dorëheqja e kryeministrit Edi Rama, ndërsa të rinjtë vijojnë të kërkojnë largimin e tij nga drejtimi i qeverisë.
