Deputetja e Partisë Socialiste, Elisa Spiropali, i është drejtuar me një letër publike kryeministrit Edi Rama, pas protestave të d...
INVESTIGIME
"Doktor Shkencash"/ Çfarë fshihet pas titullit akademik të Ulsi Manjës?
PiranjatPërditësimi i fundit 16 Tetor 2026, 22:55
Në vazhdën e denoncimeve që kemi bërë për figura të rëndësishme politike si Klodiana Spahiu, Taulant Balla, Evis Kushi e Ogerta Manastirliu, kësaj here do të flasim për kopjimet e z. Manja. Një nga nismëtarët e kësaj fushate antiplagjiaturë, bashkë me Taulant Mukën, është edhe studiuesi Vladimir Kola.
“Gjithçka nisi aty nga fundi i 2018-ës, që koincidoi edhe me protestën e studentëve si periudhë dhe unë u bëra kurioz të shihja pak tezat e doktoraturës që ishin bërë në Shqipëri. Dhe vura re që aty kishte pasur disa kopjime që ishin përkthyer fjalë për fjalë. Për sa i përket doktoraturës së z. Manja, pasi kisha parë disa doktoratura të tjera, vura re që edhe aty kishte disa kopjime pa përmendur burimin origjinal, kopjime me paragrafë dhe me faqe të tëra”, tregon z. Kola për gazetarin Freard Rista.
Ish-ministri i Drejtësisë ka marrë titullin “doktor” me disertacionin “Veprat Penale Kundër Mjedisit”, të mbrojtur në vitin 2017 në Fakultetin e Drejtësisë në Tiranë.
Në tezën në fjalë, plot 7 faqe janë kopjuar nga artikulli shkencor me titull: “E Drejta për Informim mbi Çështjet e Mjedisit: Legjislacioni Shqiptar në Vështrim Krahasues me Konventën e Aarhus-it”, me autore Irma Baraku, i publikuar në vitin 2013 në “Revistën Shqiptare për Studime Ligjore”, Vol. 7.
Një pjesë e konsiderueshme e artikullit të profesoreshës shkodrane, ku flitet për refuzimin e institucioneve për të dhënë informacion, të drejtën që lind për ankimin administrativ, ankim gjyqësor dhe rolin e Avokatit të Popullit, është marrë fjalë për fjalë dhe nuk është cituar as në fund të faqes dhe as në bibliografi.
Edhe nëse vijohet më tutje, aty ku zonja Baraku flet për ndërgjegjësimin e komunitetit në lidhje me mundësitë që ofron legjislacioni për të drejtën për aksesin në dokumentet zyrtare, në përgjithësi, dhe informacionin mjedisor në veçanti, vihet se është marrë çdo fjalë copy-paste.
Mirëpo z. Manja nuk është mjaftuar vetëm me pjesën teorike, por ka kopjuar edhe sugjerimet e zonjës Baraku.
“Nuk jam në dijeni për këtë. Po e dëgjoj për herë të parë këtë gjë. Ai, në qoftë se e ka bërë, le ta mbajë përgjegjësinë vetë”, tha ajo.
Në tezën në fjalë, faqja 71 dhe një pjesë e faqes 68 janë kopjuar nga siti i Komisionit Evropian. Për të qenë korrekt, sajti i Komisionit Evropian është listuar te literatura e konsultuar dhe është referuar në tekst me fusnotë në faqet 61 dhe 62, por nuk është referuar te faqet 71 dhe 68.
Në këtë disertacion, faqet 87-88 janë mbushur fjalë për fjalë nga “Vendimi i Këshillit të Ministrave, nr. 24, datë 22.1.2004”. Gjithashtu, një tjetër pjesë e konsiderueshme e përkthyer fjalë për fjalë është marrë nga një studim i Bankës Botërore, i vitit 2010, me titull: “Inspections Reforms: Do Models Exist?”
“Ai nga ky studim kopjon disa faqe të tëra të gatshme dhe i vendos te teza e tij e doktoraturës. Pra, janë pjesë të tezës së doktoraturës mbi mjedisin, që i ka gjetur të përshtatshme me temën e tij dhe i ka vendosur te teza e tij e doktoraturës”, shtoi studiuesi Kola./piranjat
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi.
