Deputetja e Partisë Socialiste, Elisa Spiropali, i është drejtuar me një letër publike kryeministrit Edi Rama, pas protestave të d...
INVESTIGIME
Flet i dyshuari i masakrës së Beratit/ Çfarë zbulon Kudret Zhuka?
PiranjatPërditësimi i fundit 16 Tetor 2026, 23:55
Një javë më parë u njohëm me historinë tragjike të familjes Pema, djali i së cilës, Eduardi, ishte marrë peng nga banda e Vakëfit në Berat e më pas ishte torturuar, vrarë dhe djegur në mes të qytetit si shenjë e forcës së bandës që në atë kohë zotëronte qytetin.
Vëllai i viktimës, Ronaldo, dhe nëna Hamite rrëfyen tmerrin që panë me sytë e tyre, kur djali dhe vëllai torturohej në garazhdin e kreut të kreut të bandës, ku më pas edhe u ekzekutua dhe u tërhoq zvarrë nga aty deri në sheshin e Vakëfit, ku më pas iu vendos flaka.
Këtë të premte, do të njihemi me dëshminë ekskluzive të një prej personave të dyshuar si autor i masakrës, Kudret Zhuka. Ky i fundit mohon përfshirjen e tij në krimin që ende rrëqeth qytetin. Sipas tij, ai ka qenë në banesë kur ka ndodhur ngjarja, por jep një version që nuk e ka thënë më parë, madje as në polici.
Zhuka shprehet se për ngjarjen ka marrë dijeni nga kushëriri i tij, i cili i ka thënë se ai dhe të tjerë kanë vrarë Eduard Pemën.
Por sot kushëriri nuk jeton më dhe, përderisa të vdekurit nuk flasin, kjo dëshmi nuk mund të merret parasysh. Sipas tij, Pema ka qenë një kriminel, e po ashtu edhe vëllai i tij. Po ashtu, ai lëshon një sërë akuzash ndaj Ronaldo Pemës, që nga përfshirja e tij në krime e deri te problemet mendore që, sipas Zhukës, ka ai.
Në fakt, këto pretendime, sa u përket problemeve mendore të pretenduara ndaj Ronaldos, janë hedhur poshtë edhe nga gjykata.
Zhuka kishte alibinë e tij, që mesa duket ka bindur edhe gjykatat, të cilat i kanë dhënë edhe pafajësinë. Por familjarët nuk kanë qenë dakord asnjëherë me këto vendime, duke pretenduar se e kanë parë me sytë e tyre Kudret Zhukën duke marrë peng dhe më pas dhunuar Eduard Pemën.
Pavarësisht se premtoi se do të na vinte në dispozicion dokumente që vërtetojnë pafajësinë e tij, deri në publikimin e këtij emisioni, nuk na është dhënë asnjë dokument i tillë. Në sytë e “akullt” të Zhukës nuk mund të lexosh asgjë. Mbase kjo ka qenë edhe arsyeja që gjykatat dhe prokuroritë nuk kanë arritur kurrë që ta zbardhin plotësisht këtë ngjarje, për të cilën pas hekurave ndodhet vetëm Benjamin Hajro, kreu i bandës së Vakëfit.
Ndërkohë, familjarët, edhe sot, pas gati tre dekadash, kërkojnë drejtësi për ngjarjen që u ndryshoi tërësisht jetën, që panë tmerrin me sytë e tyre dhe që ende sot rrëqeth një qytet të tërë./Piranjat
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi.
