“Mos e prek Memaliajn!” Me këtë mesazh dhe pankarta në duar, banorë të Memaliajt dolën në aksin kryesor që l...
AKTUALITET
“Gangot” me shpejtësi skëterrë nëpër rrugët e Tiranës, i postojnë dhe në TikTok
PiranjatPërditësimi i fundit 8 Maj 2026, 19:13
Një qytetar ka denoncuar publikimin e një videoje në TikTok, ku një i ri shfaqet duke ecur me shpejtësi ekstreme në një rrugë lagjeje, duke rrezikuar jo vetëm jetën e tij, por edhe të çdo kalimtari që mund të ndodhej aty.
Pamjet janë tronditëse. Në vend që rrugët të shërbejnë për siguri dhe qetësi për banorët, ato po trajtohen si pista gare nga persona që kërkojnë klikime, vëmendje dhe adrenalinë në rrjetet sociale.
Ajo që e bën edhe më revoltues këtë rast është fakti se vjen në një moment kur i gjithë opinioni publik është ende i tronditur nga aksidenti fatal që u mori jetën dy fëmijëve të pafajshëm. Një tragjedi që duhej të shërbente si kambanë alarmi për shoferët e papërgjegjshëm, por mesa duket për disa, as vdekja nuk mjafton për t’u ndërgjegjësuar.
Fenomeni i të rinjve që filmojnë veten duke fluturuar me makina nëpër lagje, duke shkelur çdo limit shpejtësie dhe çdo rregull sigurie, po merr përmasa alarmante. Dhe ndërsa videot mbledhin pëlqime në TikTok, qytetarët jetojnë me frikën se trotuari apo rruga para shtëpisë mund të kthehet në skenë tragjedie nga një moment në tjetrin.
Qytetarët kërkojnë reagim të menjëhershëm nga Policia Rrugore, identifikimin e personave që publikojnë pamje të tilla dhe masa të ashpra ndaj kujtdo që e trajton jetën e njerëzve si lojë për rrjete sociale.
