Koreja e Veriut prezantoi të enjten një impiant të ri për prodhimin e lëndës djegëse që përdoret në bombat b...
AKTUALITET
Në gjendje kritike për jetën, foshnja 2-muajshe niset nga Korça drejt Tiranës
PiranjatPërditësimi i fundit 13 Mars 2026, 16:22
Është nisur drejt Tiranës për mjekim më të specializuar foshnja 2-muajsh nga Korça, e cila rrezikonte jetën pasi nëna nuk e ushqeu me gji. Raportohet se gjendja e saj shëndetësore vijon të jetë kritike. Në pediatrinë e spitalit rajonal të Korçës foshnja 2-muajshe mbërriti në gjendje shumë të rëndë shëndetësore.
Burime konfidenciale nga policia dhe spitali bëjnë të ditur se foshnja aktualisht është në gjendje të rëndë shëndetësore, ndërsa dyshohet se kjo gjendje ka ardhur nga kequshqyerja. Foshnja ka lindur dy muaj më parë, prematurë (7 muajsh). Është trajtuar në spitalin e Korçës e më pas në Tiranë, nga ku raportohet se ka dalë në gjendje të mirë shëndetësore, por pas kthimit në shtëpi ka shfaqur probleme të rënda shëndetësore.
Sipas po të njëjtave burime, dyshohet se ka qenë nëna ajo që nuk është kujdesur për foshnjën për ta ushqyer me gji dhe ky dyshohet të jetë shkaku kryesor i gjendjes së rënduar. Po ashtu, dyshohet se nëna ka probleme të shëndetit mendor, por detaje të reja priten të zbardhen në vijim për të përcaktuar nëse kjo e fundit ka shfaqur shenja të përkeqësimit pas lindjes së fëmijës.
Sipas burimeve spitalore, sqarohet se gjendja e foshnjës vijon të mbetet e rëndë, ndërsa mjekët po shohin mundësinë për ta transportuar drejt Tiranës për mjekim të specializuar. Nga ekzaminimet, parametrat jetësorë janë në kufijtë minimalë ndërsa mjekët jashtë kamerave sqarojnë se në momentin e parë që foshnja ka mbërritur në pediatrinë e spitalit të Korçës, ka qenë në gjendje shumë të rënduar, me probleme të theksuara respiratore dhe me peshë 1 kg.
Kjo peshë ka qenë që në momentin që ka lindur e deri më sot pas 2 muajsh, çka do të thotë se foshnja nuk ka patur asnjë zhvillim. Kequshqyerja mbetet dyshimi kryesor i policisë por nuk përjashtohen edhe rrethana të tjera që lidhen me lindjen e parakohshme.
Policia ndodhet në pediatrinë e spitalit, ndërsa mjekët po bëjnë të pamundurën për të shpëtuar foshnjën 2 muajshe.
