Deputetja e Partisë Socialiste, Elisa Spiropali, i është drejtuar me një letër publike kryeministrit Edi Rama, pas protestave të d...
AKTUALITET
“Ne vritemi me policët, përfiton Rama”/ Protestuesi flet përballë efektivëve: Jep dorëheqjen dhe shporru!
PiranjatPërditësimi i fundit 16 Tetor 2026, 20:30
Një moment dialogu mes protestuesve dhe efektivëve të policisë është regjistruar mbrëmjen e sotme në bulevardin “Dëshmorët e Kombit”, pas orëve të tensionuara dhe ndërhyrjeve të forcave të rendit për shpërndarjen e turmës.
Një prej protestuesve iu drejtua policëve që ndodheshin përballë tij, duke u shprehur se të rinjtë nuk kanë konflikt me ta, por kërkojnë largimin e kryeministrit Edi Rama.
“Nuk kemi zgjidhje. 130 ditë kemi protestuar si njerëz. Ramës nuk i dhimbsen as këta. Ne vritemi me këta, përfiton ai”, u shpreh protestuesi, duke iu referuar përplasjeve mes demonstruesve dhe policisë.
Ai theksoi se efektivët e policisë janë pjesë e së njëjtës shoqëri dhe se protestuesit nuk duan të përballen me ta.
“Këta i kemi vëllezër, i kemi prindër. Policia nuk ka faj, fajin e ka Edi Rama”, deklaroi ai.
Në vijim, protestuesi përsëriti kërkesën për dorëheqjen e kreut të qeverisë, duke iu drejtuar drejtpërdrejt kryeministrit: “Jep dorëheqjen dhe shporru”.
Deklarata u bë gjatë një periudhe qetësie në bulevard, ku protestuesit ishin rikthyer pas përplasjeve të mëparshme dhe disa prej tyre po bisedonin nga afër me punonjësit e policisë.
Më herët gjatë mbrëmjes, forcat e rendit kishin përdorur gaz lotsjellës dhe ujë me presion për të shpërndarë turmën, ndërsa protestuesit ishin zhvendosur në zona të ndryshme të Tiranës.
Rikthimi në bulevard u shoqërua me një atmosferë më të qetë, megjithëse mes demonstruesve pati qëndrime të ndryshme për vazhdimin e tubimit. Disa kërkuan përfundimin e protestës për mbrëmjen, ndërsa shumica kundërshtoi largimin.
Fjalët e protestuesit pasqyruan qëndrimin e tij se përgjegjësia politike për situatën i takon kryeministrit dhe jo efektivëve të policisë, me të cilët demonstruesit janë përballur gjatë katër ditëve të protestave.
