Deputetja e Partisë Socialiste, Elisa Spiropali, i është drejtuar me një letër publike kryeministrit Edi Rama, pas protestave të d...
AKTUALITET
Protestuesit bllokojnë kryqëzimin pas Muzeut Kombëtar, u vënë flakën stolave plastikë
PiranjatPërditësimi i fundit 16 Tetor 2026, 19:49
Protesta në Tiranë vijon të zhvendoset nga një zonë në tjetrën, ndërsa një grup demonstruesish është përqendruar tashmë pas Muzeut Historik Kombëtar, në kryqëzimin mes sheshit “Skënderbej” dhe bulevardit “Zogu I”.
Në këtë pikë, protestuesit kanë marrë disa stola plastikë që ndodheshin në shesh, i kanë vendosur në mes të rrugës dhe u kanë vënë flakën, duke krijuar një barrikadë të improvizuar që ka bllokuar kryqëzimin.
Zjarri ka shkaktuar tym në zonë, ndërsa pengesat e vendosura në rrugë kanë ndërprerë qarkullimin e automjeteve në këtë pjesë të kryeqytetit.
Incidenti shënon një tjetër zhvillim gjatë mbrëmjes së ditës së katërt të protestave studentore, të cilat po shoqërohen me përplasje me policinë dhe dëmtime të pronës publike e private.
Më herët, forcat e rendit ndërhynë disa herë në bulevardin “Dëshmorët e Kombit”, duke përdorur gaz lotsjellës dhe ujë me presion për të shpërndarë turmën. Pas boshatisjes së bulevardit, protestuesit u shpërndanë në disa drejtime, përfshirë Parkun Rinia dhe zonën e “9-katësheve”.
Edhe te “9-katëshet” u raportua përdorimi i gazit lotsjellës nga policia, ndërsa një kioskë u përfshi nga flakët.
