Detaje të reja kanë dalë në dritë për aksidentin e rëndë të ndodhur në Glyfada të Athinës, ku humb&e...
INVESTIGIME
“Dua 120 mijë euro”/ Si u zaptua prona në rrugën e Durrësit, zbardhet skema e mashtrimit
PiranjatPërditësimi i fundit 18 Shtator 2026, 22:42
Jemi në Tiranë, në rrugën e Durrësit, aty ku një apartament është kthyer në “mollë sherri” dhe ka ndezur debate të ashpra mes pronarëve dhe personave që e kanë marrë me qira, të cilët, në shkelje të kontratës, sot nuk pranojnë të dalin nga shtëpia, duke krijuar një skemë të mirëfilltë mashtrimi, qiraje dhe më pas nënqiraje. Gjithçka nisi kur një person, i quajtur Gentian Zavalani, kërkoi të marrë me qira banesën e çiftit, Lavdije dhe Gëzim Ago.
Por Zavalani ishte veçse një person i përdorur nga Asiola dhe Albert Sula, me qëllim që të merrnin apartamentin, pasi çifti kishte refuzuar prej kohësh t’ia jepnin atij, për shkak të mungesës së besimit. Të gjendur përballë kësaj situate, çifti Sula gjetën zgjidhjen “perfekte”, duke përdorur Zavalanin.
Kur çifti Ago kuptoi se çfarë po ndodhte, ishte tepër vonë, pasi tashmë Asiola dhe Albert Sula kishin ngritur një strukturë biznesi në pronën e tyre, duke përdorur kontratën e nënqirasë të firmosur me Gentian Zavalanin. Këtu do të nisnin edhe përplasjet, ndërsa në një video, Alberti shihet duke kërcënuar dhe sharë me fjalor banal edhe punonjësit e shtetit.
Nga ajo që kuptojmë, në këtë histori me zaptim prone, është se Alberti ndihet pronar në një shtëpi që e ka marrë me një kontratë nënqiraje, e cila është përpiluar dhe firmosur me hije dyshimi për vërtetësinë e saj dhe që, për më tepër, i ka humbur efekti.
Sepse, referuar kontratës së qirasë të firmosur më datë 1 gusht 2024, mes Gëzim dhe Lavdie Agos me zotin Gentian Zavalani, në pikën 2 thuhet qartësisht se kjo marrëveshje e humb legjitimitetin e saj më 1 gusht 2025. Dhe vetëm nëse palët bien dakord, 30 ditë përpara afatit të përfundimit të saj, pra në korrik 2025, atëherë kontrata mund të rinovohet edhe për dy vite të tjera.
Ndërkohë, një pikë tjetër e rëndësishme është ajo që përcakton se, nëse nuk bëhet pagesa e qirasë në kohën që është rënë dakord mes palëve, atëherë kontrata do të prishet automatikisht…
Pra, një kontratë e skaduar dhe e shkelur me të dy këmbët nga qiramarrësi, që në fakt është nën/qiramarrës, sepse qiramarrësi i vërtetë, Gentian Zavalani, ka dalë tërësisht jashtë loje. Por këtu nis një tjetër problem për pronarët e ambientit, sepse Alberti ka pretendime pasi i kërkon çiftit Ago 120 mijë euro me pretendimin e investimit në pronë.
Për të kuptuar se çfarë ka ndodhur, fillimisht takuam Gentian Zavalanin, i cili duket se ka edhe rolin kyç në këtë histori. Por, në mungesë të argumenteve, ai tenton t’i shmanget përgjegjësisë, derisa në fund zbërthen skemën e mashtrimit, kërkon ndjesë dhe zotohet se nuk do të bëjë më gabime.
Ndërsa Albert Sula, i cili vijon të qëndrojë në banesë, ka pretendime të tjera.
Ai këmbëngul që kontrata e nënqirasë është në konformitet me ligjin dhe se nuk e ka përdorur Zavalanin si karrem për ta marrë fillimisht banesën me qira të çiftit Ago, edhe pse vetë Gentiani e pranon në përballjen me ne se ndihet i përdorur dhe se që në fillim e ka marrë shtëpinë me qira te Lavdia dhe Gëzimi, me qëllim që ajo pronë më pas të përdorej nga Alberti dhe Asiola.
Tashmë çështja është në duart e drejtësisë, e cila ka për detyrë t’i japë zgjidhje përfundimtare këtij konflikti./piranjat news
“Në çdo vend të Europës plagjiatura është mashtrim, vepër penale, dhe në Shqipëri personazhe të tillë jo vetëm që duhet të kishin dhënë dorëheqjen dhe të ishin larguar nga jeta publike, por duhet të ishin marrë masat që këtyre personave t’u ishin hequr titujt, të kishin kthyer paratë që kanë marrë për shkak të këtyre titujve dhe të ishin krijuar të gjitha rregullimet ligjore apo legjislative që këto fenomene të parandaloheshin”, përfundon studiuesi Muka./piranjat news
