Personi në foto, efektivi i ‘Shqiponjave’ Edison Adri, i cili mbeti i plagosur gjatë operacionit policor të zhvilluar në zon&e...
INVESTIGIME
Kreditë, pasuritë dhe kompanitë fantazmë që Ceno Klosi nuk i deklaroi kurrë
PiranjatPërditësimi i fundit 24 Nëntor 2025, 12:15
Një tjetër procedim penal është regjistruar ndaj ministres së Infrastrukturës dhe Energjitikës, njëherazi dhe Zëvendëskryeministres Belinda Balluku dhe ish-vartësit të saj, tashmë deputet i PS, Ceno Klosi
Emërimi i Ceno Klosit në krye të Drejtorisë së Tatimeve më 22 tetor 2021 hap një sërë pikëpyetjesh ligjore dhe etike. Dokumentet e siguruara nga “Piranjat News” lidhur me kompaninë britanike “FIRST BAR LIMITED” tregojnë një situatë të papajtueshme me detyrën publike që ai mban, duke ngritur dyshime të forta për konflikt të vazhdueshëm interesi që nga koha e marrjes së postit e deri sot.
Bizneset e padeklaruara jashtë vendit
Që prej janarit 2019, kur Klosi ishte ende në krye të AKUM-it, ai rezulton të ketë qenë aksioner me 33% në “FIRST BAR LIMITED”, një shoqëri private në Londër që operon në sektorin e shërbimeve ushqimore. Pavarësisht detyrimit ligjor për deklarim të plotë, ai ka përmendur vetëm pjesën e aksioneve, duke mos zbuluar detaje të tjera thelbësore për aktivitetin, financat dhe detyrimet e kësaj kompanie.
Hetimi i gazetarëve ka zbuluar se kompania ka përfituar kredi, ka marrë hua dhe ka krijuar fonde likuiditeti pa u reflektuar kurrë në deklarimet e Klosit pranë institucioneve shqiptare. Ky fakti bie ndesh me kërkesat e ligjit nr. 138/2015, i cili i obligon zyrtarët e nivelit të lartë të deklarojnë me vetpërgjegjësi çdo pasuri e burim të ardhurash përpara se të marrin detyrën.
Transaksionet financiare të fshehura
Sipas të dhënave zyrtare britanike, më 5 maj 2020 “FIRST BAR LIMITED” ka përfituar 50 mijë paund kredi nga programet mbështetëse të qeverisë së Mbretërisë së Bashkuar gjatë pandemisë. Megjithatë, në deklarimin fillestar të pasurisë së Klosit pranë ILDKPKI-së në vitin 2021, kjo kredi nuk figuron. Për më tepër, për të njëjtën kompani rezultojnë edhe qindra mijëra paund borxhe dhe hua nga subjekte të paidentifikuara, të cilat nuk janë deklaruar asnjëherë.
Për vitin 2020, bilanci i kompanisë paraqet rreth 157 mijë paund detyrime, të cilat rriten në 200 mijë paund në vitin 2021 pas marrjes së kredive bankare. Në formularët zyrtarë ndodhet mangësi edhe më e rëndë: mungon deklarimi i fondit të përbashkët të aksionerëve prej 120 mijë paund.
Konflikti i interesit me funksionin publik
Pozicioni i Drejtorit të Përgjithshëm të Tatimeve nuk përputhet me faktin që Klosi vazhdon të zotërojë aksione në një kompani të huaj të regjistruar si biznes aktiv. Ligji nr. 9920 për Procedurat Tatimore ndalon qartë që punonjësit e administratës tatimore të kenë kompetencë për vlerësimin apo kontrollin e subjekteve me të cilat ata vetë janë të lidhur financiarisht.
Dokumentet e siguruara nga “Piranjat News” tregojnë se ai është ende aksioner tek “FIRST BAR LIMITED”, duke mos qenë asnjëherë tërhequr prej saj, pavarësisht se ligji për Parandalimin e Konfliktit të Interesave ia ndalon mbajtjen e aksioneve në shoqëri tregtare kur funksioni publik lidhet drejtpërsëdrejti me trajtimin dhe mbikëqyrjen e tyre.
Mosheqja dorë nga aktiviteti privat e bën konfliktin e interesit jo vetëm momental, por të vazhdueshëm.
Kompania tjetër e fshehur
Hetimi ka zbuluar edhe një shoqëri të dytë të lidhur me të, “RCR BARS LIMITED”, ku Klosi ka qenë njëkohësisht administrator dhe aksioner, në bashkëpronësi me të njëjtët ortakë të “FIRST BAR LIMITED”. Kjo kompani është krijuar në janar 2019 dhe është mbyllur vetëm 4 muaj më vonë, pa publikuar asnjë bilanc financiar. Edhe në këtë rast ngrihet pyetja nëse shoqëria është deklaruar apo jo pranë autoriteteve shqiptare në kohën kur Klosi ushtronte detyrën në OSHEE./Piranjat News
