Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
KOSOVA
U akuzua se dhunoi ish-deputetin, reagon kreu i PDAK-së: Ka provokuar dhe ofenduar me familje duke përdorur gjuhë të rëndë
PiranjatPërditësimi i fundit 14 Tetor 2025, 13:59
Partia Demokratike e Ashkalinjve të Kosovës ka reaguar pas akuzave të ish-deputetit Danush Ademi, i cili pretendoi se ishte sulmuar fizikisht nga disa persona, mes tyre edhe kryetari i PDAK-së, Qazim Rrahmani. Në një deklaratë për media, PDAK ka mohuar kategorikisht çdo përfshirje të Rrahmanit në incident dhe e ka quajtur ngjarjen një “përplasje familjare” pa karakter politik.
Sipas reagimit zyrtar të partisë, incidenti ndodhi më 12 tetor 2025 në fshatin Dubravë, pas një provokimi verbal nga Danush Ademi ndaj familjes Rrahmani. PDAK pretendon se Ademi ka përdorur “fyerje të rënda dhe jo njerëzore”, që kanë nxitur një kacafytje mes palëve.
“Danush Ademi ka provokuar dhe ofenduar familjen Rrahmani me gjuhë të rëndë, dhe si rezultat ka ndodhur një incident mes tyre si familjarë. Kjo nuk ka të bëjë aspak me çështje politike apo procesin zgjedhor. Rasti tashmë ndodhet në duart e Policisë,” thuhet në deklaratën e PDAK-së.
Partia thekson gjithashtu se Ademi po mundohet të viktimizohet për të mbuluar humbjen e radhës në zgjedhje dhe se, sipas tyre, që nga viti 2019, ai i ka humbur të gjitha garat elektorale kundrejt Qazim Rrahmanit.
“Kryetari Qazim Rrahmani nuk ka ofenduar dhe nuk ka sulmuar Danush Ademin. Ai (Ademi) po përdor shpifje dhe viktimizim për të dëmtuar imazhin e Kryetarit dhe të PDAK-së, pas humbjes në zgjedhje,” thuhet më tej në reagim.
PDAK bën thirrje për qetësi dhe dialog, duke u shprehur se një përplasje mes përfaqësuesve të komunitetit nuk i shërben askujt dhe dëmton gjithë komunitetin ashkali.
“Ne kërkojmë mirëkuptim nga qytetarët, dhe u bëjmë thirrje të dyja palëve që të ulen, të flasin dhe të gjejnë një zgjidhje përmes pajtimit, jo përçarjes. Kjo situatë nuk pasqyron vlerat e komunitetit tonë,” përfundon reagimi i PDAK-së.
