Drejtori i Përgjithshëm i Policisë së Shtetit, Skënder Hita ka mbërritur në Drejtorinë e Policisë së Kor&cce...
KOSOVA
Zgjedhjet në Kosovë, KQZ: Ja kur do të bëhet numërimi i votave me kusht, nga diaspora dhe për persona me nevoja të veçanta
PiranjatPërditësimi i fundit 14 Tetor 2025, 12:20
Komisioni Qendror i Zgjedhjeve ka bërë të ditur se numërimi i fletëvotimeve nga votimi me kusht, votimi i personave me nevoja të veçanta dhe votimi jashtë Kosovës do të realizohet në Qendrën e Numërimit dhe Rezultateve, sapo të përfundojë procesi në Qendrat Komunale të Numërimit (QKN).
Zëdhënësi i KQZ-së, Valmir Elezi, konfirmoi për Telegrafin se deri më tani janë grumbulluar 2,119 zarfe me fletëvotime nga votimi me kusht, të zhvilluar në 54 vendvotime përkatës në 38 komuna të Kosovës.
Po ashtu, nga votimi jashtë vendit, i realizuar përmes postës, janë tërhequr 33,258 zarfe nga 22 kuti postare në totalin prej 23 kutish të vendosura për këtë qëllim.
Ndërkohë, nga programi i votimit jashtë vendvotimeve për personat me nevoja të veçanta, ku ishin regjistruar 3,467 votues, KQZ pritet të publikojë së shpejti të dhënat përfundimtare.
Procesi në vendvotime dhe Qendrat Komunale të Numërimit
Më 13 tetor është përmbyllur numërimi i votave të kandidatëve për kryetarë komunash dhe i votave për subjektet politike në 2,571 vendvotime të rregullta. Materialet zgjedhore janë dërguar në 38 Qendra Komunale të Numërimit, ku po vazhdon numërimi i votave për kandidatët për anëtarë të Kuvendeve Komunale, si dhe verifikimi i formularëve të mbushur në vendvotime.
Sipas KQZ-së, në këtë proces janë përfshirë mbi 520 ekipe numërimi, me më shumë se 2 mijë anëtarë, ndërsa numërimi po zhvillohet në dy orare pune për të përshpejtuar përfundimin e procesit.
Procesi i numërimit po realizohet nën monitorimin e vëzhguesve dhe me garanci për transparencë të plotë.
Pjesëmarrja jashtë vendvotimeve Krahas votimit të rregullt, KQZ ka mundësuar:
Votimin me kusht në 54 vendvotime
Votimin jashtë vendvotimeve për 3,467 persona me nevoja të veçanta
Votimin jashtë Kosovës për 43,933 qytetarë me të drejtë vote.
Numërimi i këtyre fletëvotimeve do të nisë në Qendrën e Numërimit dhe Rezultateve, pas përfundimit të punës në QKN-të komunale. KQZ pritet të publikojë rezultatet përfundimtare pas përmbylljes së të gjithë procesit të numërimit dhe verifikimit.
