Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
Parku fotovoltaik përfundon në KPP, ankimohet dhënia me qira e 10 hektarëve
PiranjatPërditësimi i fundit 20 Qershor 2023, 10:17
Ankandi i dhënies me qira të një toke për ndërtimin e një parku fotovoltaik ka përfunduar në Komisionin e Prokurimit Publik si ankesë e një operatori që ka marrë pjesë në garë. Pranë KPP u regjistrua një ankimim kundër Bashkisë së Vaut të Dejës lidhur me një sipërfaqe 10 hektarë ku parashikohet ndërtimi i një parku fotovoltaik për prodhimin e energjisë.
Në fakt procedura u çel vitin e shkuar për një sipërfaqe edhe më të madhe prej rreth 40 hektarësh por duket se ankimimi ka të bëjë vetëm me lotin II por në ankimimin e bërë publik nuk ka dokumente shoqërues që shpjegojnë arsyet e ankesës.
Procedura e dhënies së tokës me qira u njoftua shtator 2022 në të njëjtën kohë me një tjetër që kishte të bënte me zhvillimin e projekteve të turizmit në Bashkinë Kukës. Sa i takon fotovoltaikut, Bashkia e Vaut të Dejës kishte parashikuar shfrytëzimin nga privati për një afat 9-vjeçar.
Bashkia njoftoi në atë kohë fillimin e procedurave me anë të konkurrimit për sipërfaqen e fondit pyjor/kullosor publik që i përket ekonomisë Pyjore Drin Gjadër Kirë, ngastrat Nr. 4,në sipërfaqe prej 35 ha dhe ngastra Nr. 10 në sipërfaqe prej 5.3,ha,Gjithsejt 40.3 ha “për park fotovoltaik, me afat përdorimi (qiraje), 9 (nëntë) vite.
“Çmimi dysheme i fillimit të konkurrimit është 143,000 leke/ha/vit dhe per 40.3 ha është 5,762,900 lekë në vit në sipërfaqe djerre , e përllogaritur kjo sipas VKM nr.559, datë 29.07.2022 “Për përcaktimin e çmimeve dhe tarifave për dhënien në shfrytëzim/përdorim të fondit pyjor kombëtar, për veprimtari ekonomike, si dhe për prodhimet drusore dhe jodrusore Pyjore”” thuhet në dokumentin e Bashkisë.
Kjo e fundit përcaktonte edhe mënyrën sesi do të bëhej pikëzimi i ofertave të të interesuarve dhe dokumentet që duhet të paraqiteshin për ankandin që ishte parashikuar si fillim në datën 29 shtator 2022.
Interesi për impiantet fotovoltatikë ka qenë në rritje sidomos gjatë vitit dy viteve të fundit për shkak të krizës së energjisë e cila edhe pse duket se ka rënë në një periudhë qetësie sërish vlerësohet se rreziku ende nuk ka kaluar.
Çmimet e qetësuar prej disa muajsh tashmë mund të pësojnë rritje në verë në kushtet kur ende tregjet ende janë të trazuar edhe për shkak të vijimit në konfliktit mes Rusi-Ukrainë.
Bizneset instalatore të impianteve raportojnë për rritje me disa herë të interesit në raport me tendencën e zakonshme para krizës teksa projektet përfshijnë si vetëprodhimin edhe shitjen në treg të lirë të energjisë.
Tashmë për burimet e rinovueshme është miratuar një ligj i ri për të cilin mbeten për miratim aktet nënligjore që do ta bëjnë atë të zbatueshëm me risitë që sjell përfshirë faturimin vjetor./Monitor
