Deputetja e Partisë Socialiste, Elisa Spiropali, i është drejtuar me një letër publike kryeministrit Edi Rama, pas protestave të d...
AKTUALITET
Tensionet zhvendosen te “9-katëshet”, policia hedh gaz lotsjellës, një kioskë përfshihet nga flakët
PiranjatPërditësimi i fundit 16 Tetor 2026, 19:41
Tensionet e ditës së katërt të protestave studentore janë zhvendosur në zonën e “9-katësheve” në Tiranë, ku një numër i madh protestuesish është grumbulluar pas ndërhyrjeve të policisë në bulevardin “Dëshmorët e Kombit”.
Forcat e rendit po përdorin gaz lotsjellës për të shpërndarë turmën, ndërsa protestuesit vijojnë të qëndrojnë dhe të lëvizin në rrugët përreth.
Situata është rënduar edhe nga një vatër zjarri. Një kioskë në këtë zonë është përfshirë nga flakët, duke shkaktuar tym dhe duke shtuar shqetësimet për sigurinë e personave që ndodhen pranë.
Ende nuk ka informacion të konfirmuar për shkakun e zjarrit, përmasat e dëmeve materiale apo nëse ka persona të lënduar nga ky incident.
Zhvendosja e turmës te “9-katëshet” vjen pasi policia ndërhyri për herë të tretë gjatë mbrëmjes për të larguar protestuesit nga bulevardi “Dëshmorët e Kombit”, duke përdorur gaz lotsjellës dhe ujë me presion.
Në atë operacion morën pjesë forcat e Ndërhyrjes së Shpejtë dhe efektivët “Shqiponja”, të mbështetur nga dy automjete ujëhedhëse. Pas ndërhyrjes, një pjesë e protestuesve u përqendrua në zonën e Parkut Rinia, ndërsa grupe të tjera vijuan marshimin në drejtime të ndryshme.
Tashmë, një prej grumbullimeve kryesore është zhvendosur te “9-katëshet”, ku përplasja mes protestuesve dhe forcave të rendit po vijon mes gazit lotsjellës dhe tymit të shkaktuar nga zjarri.
Protestuesit vijojnë të kërkojnë dorëheqjen e kryeministrit Edi Rama, kërkesë që ka qenë në qendër të katër ditëve të demonstratave.
