Edi Rama ka rikthyer në vëmendje krizën e drejtimit të Bashkisë së Tiranës, ndërsa kryebashkiaku Erion Veliaj ndodhet ...
INVESTIGIME
ISO dhe 66 punonjës / Si u “kopsit” gara nga Tonin Marinaj që “ngrohu” xhepat e kompanive
PiranjatPërditësimi i fundit 27 Nëntor 2025, 11:20
Një tender i dyshimtë në Bashkinë Malësi e Madhe ngre shqetësime serioze për mungesë transparence dhe kufizim të konkurrencës. Në qendër është kryetari i bashkisë Tonin Marinaj, i cili dyshohet se ka “kopsitur” procedurat për t’ia dhënë tenderin një bashkimi operatorësh. Dokumentet dhe kriteret e vendosura tregojnë për një proces që ngjall dyshime mbi ligjshmërinë dhe qëllimin për të favorizuar ofertues konkretë.
Kryetari i Bashkisë Tonin Marinaj ka hapur garën pa garë me objekt “Ndërtim i impiantit të ngrohjes në shkollat e mesme Koplik – Bazë Gruemirë”. Fondi limit i përcaktuar nga autoriteti kontraktor rezulton rreth 328 mijë euro. Në tender mori pjesë vetëm një bashkim operatorësh, duke u sinjalizuar menjëherë në Open Data me flamur të kuq për mungesë konkurrence.
Fitues automatikisht u shpall bashkimi i operatorëve MICULI shpk & EVEREST shpk. Në këtë tender vërehen disa problematika, përveç faktit që oferta e konkurrentit të vetëm në garë është vetëm 1.27% më e ulët se fondi limit, ose thënë ndryshe sa 98.74% e fondit.
Në këtë tender ka dyshime të arsyeshme se kryetari i Bashkisë ka kufizuar garën me qëllim uljen e pjesëmarrësve në tender.
Pra, çfarë ka ndodhur?
Kryebashkiaku i Malësisë së Madhe ka kërkuar që ofertuesi duhet të jetë i pajisur me certifikatat ISO 9001, 14001–2015 dhe 4500–2018.Certifikatat duhet të jenë në gjuhën e ofertës dhe në përputhje me natyrën e objektit që tenderohet.
Por në rastet e bashkimit të operatorëve, këto certifikata duhet t’i ketë secili operator në bazë të përqindjes së punimeve që merr përsipër në akt-marrëveshje. Vendosja e kërkesës “Certifikatat duhet të jenë në gjuhën e ofertës” nga Bashkia Malësi e Madhe është kërkesë kufizuese për pjesëmarrjen e operatorëve ekonomikë të mundshëm, nëkundërshtim me ligjin nr. 162, datë 23.12.2020.
Por këto problematika në këtë tender bashkia i ka përsëritur edhe në një pikë tjetër. Në pikën 2.3.4 Bashkia e Malësisë së Madhe, në kapacitete teknike, ka kërkuar që “ofertuesi duhet të ketë një punësim mesatar jo më pak se 66 punonjës për periudhën Mars 2022 – Maj 2022”.
Por ky kriter është përsëri i paargumentuar dhe jo në përputhje me VKM nr. 285, datë 19.05.2029. Kjo dispozitë përcakton të drejtën që kanë AK për të kërkuar fuqinë minimale punëtore që OE duhet të disponojnë për ekzekutimin e objektit të prokurimit, pa përcaktuar periudhë kohore se për sa kohë duhet të disponohet ky numër punonjësish. Për AK mjafton që në momentin e paraqitjes së ofertës OE të disponojnë fuqinë minimale punëtore, pa qenë e nevojshme që këto kapacitete të shtrihen në periudha të mëvonshme.
Por për cilët është “kopsitur” ky tender?
Kompania Miculi ka si aksioner Gjergj Miculi me 33.33% të aksioneve, e ndjekur nga Antonjeta Miculi me po të njëjtën vlerë aksionesh 33.33% dhe po ashtu aksioneri tjetër Viktor Miculi me 33.33% të aksioneve. Kompania tjetër e bashkuar është subjekti Everest me aksioner Sokol Çupi me 25% të aksioneve, Ilir Çupi me 25% të aksioneve, Hyqmet Valteri me 12.5% të aksioneve, Esat Valteri me 12.5% të aksioneve dhe Kujtim Valteri me 12.5% të aksioneve./Piranjat.news
Të gjitha të drejtat e këtij materiali janë pronë ekskluzive dhe e patjetërsueshme e Piranjat.al sipas ligjit Nr. 35/2016 “Për të drejtën e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi pa autorizimin e Piranjat.al në të kundërt çdo shkelës do të mbajë përgjegjësi
